Бакр аз-Заранжарий

Абул Фазл Бакр ибн Муҳаммад аз-Заранжарий - Бухоронинг Заранжарий номли қишлоғидан. Бу киши фозил имом бўлиб, Абу Ҳанифа мазҳабининг фиқҳий масалаларини ёддан билар эдилар. Фатво беришда Абу Ҳанифанинг далил ва исботларига таянардилар. Узоқ умр кўрганлар. Ҳадис илмидан кўп таълим берганлар ва кўп шогирд ҳам тарбиялаганлар. Кўп устоздан таълим олганлар. Жумладан, шамс ул-аимма (имомлар қуёши) Абдулазиз ибн Муҳаммад ал-Ҳалвоий, Абу Саҳл Аҳмад ибн Али ал-Абивардий, Абу Ҳафс Умар ибн Мансур ал-Ҳофиз, Аҳмад ибн Муҳаммад ал-Бужалий ал-Ҳофиз, Маймун ибн Али ал-Маймуний, Муҳаммад ибн Сулаймон ал-Кохуштувоний ва Аҳмад ибн Абдуллоҳ ал-Хайрохарий бу кишининг устозларидирлар. У кишидан Косонда Абу Ҳафс Умар ибн Муҳаммад ал-Фарғоний, Балхда Абу Жаъфар Аҳмад ибн Муҳаммад ал-Ҳалимий, Самарқандда Абул Фазл Муҳаммад ибн Али аз-Замий ва Бухорода Абу Муҳаммад Абдулҳалим ибн Муҳаммад ал-Барроний ҳадис ривоят қилганлар. Ҳижрий 427 (милодий 1037) йилда туғилиб, ҳижрий 512 (милодий 1119) йил рабиъул аввал ойининг ўн тўққизинчисида, пайшанба куни эрталаб Бухорода оламдан ўтганлар. Калобод қабристонида дафн этилганлар.