Аллоҳ хизби.

Бисмиллааҳир Роҳмаанир Роҳиим.Ва алайкум ассалом."Ҳизб" сўзи тўп, тўда, бўлак деган маъноларни англатади. Истилоҳда эса Қуръоннинг бир бўлагини англатади. Мусулмонлар қадимдан, Росулуллоҳ соллаллоҳу алайҳи васалламнинг даврларидан бошлаб, Қуръонни ёд олиш ва вазифа қилиб ўқиб юриш учун уни ўзларига қулай бўлган маълум бўлакларга тақсимлаб олганлар. Бунда баъзилар сураларга, бошқалар калималарга, учинчилари эса ҳарфлар ададига кўра тақсимлаган. Аммо бу нарса ўзбошимчалик билан эмас, суннат асосида ёки билимдон устозлар таълимларига кўра бажарилган. Қуръон илмига доир китобларда бу борада етарли маълумотлар келган. Унга кўра, Қуръони Карим 3тадан тортиб, 360та бўлаккача тақсимланган. Аммо, салафлар, уламолар орасида энг машҳур бўлгани Қуръонни 30 жузга, 60 ҳизбга тақсимлаш бўлган ва кейинчалик мусҳафларда бу тақсимни акс эттриш одат тусига кирган. Буларнинг барчасида Қуръонни ўрганишни, ёдлашни, ўқиб юришни осонлаштириш мақсад қилинган. Бу ҳам бўлса Ислом умматининг Қуръони Каримга бўлган юксак эҳтимомининг нишонаси ҳисобланади, инсоният тарихида ҳеч бир китоб Қуръони Каримчалик ҳурмат ва эътиборга сазовор бўлмаганининг далили ҳисобланади. Валлоҳу аълам.