Маййитни қабрга қўйишда тупроқ солиш
Ассалому алайкум! Мени бувим оламдан ўтдилар. Жаноза намозини адо қилганимиздан кейин қабрга олиб бориб қўйдик. Қабрга қўётган вақтимизда ўша ердаги одамлар бир нечта белбоғга бир ховучдан (қабрни кавлаганда ҳосил бўлган) тупроқни солиб, адашмасам қабрнинг бир чеккасига тўкишди. Менимча бу ишни олдин қариялар хиссамиз қўшилсин деб тугунларга ховучдан тупроқ солиб, қабр кўмилаётган вақт ўша тугунлардаги тупроқлар тўкилган деган фикрга бордим. Савол: 1) Қабр ичига юқорида айтилгандек тупроқ тўкиш бидъат эмасми яъни жоизми? 2) Агар шаръий жоизмас бўлса, шу ишга шерик бўлганлик каффорати қандай бўлади?
– Ва алайкум ассалом! Аслида бир ховуч деган нарса йўқ. Маййит қабрининг бош томонидан уч сиқим тупроқ ташлаши мустаҳабдир.
عَنْ أَبِي هُرَيْرَةَ رَضِي اللهُ عَنْهُ: أَنَّ رَسُول اللهِ صَلَّى اللهُ عَلَيْهِ وَسَلَّمَ صَلَّى عَلَى جِنَازَةٍ ، ثُمَّ أَتَى الْقَبْرَ فَحَثَى عَلَيْهِ مِنْ قِبَل رَأْسِهِ ثَلاَثًا. أَخْرَجَهُ أَحْمَدُ
Абу Ҳурайра розиаллоҳу анҳудан ривоят қилинади:
“Расулуллоҳ соллаллоҳу алайҳи васаллам бир маййитга намоз ўқидилар. Сўнгра қабрига келиб, боши томонидан уч сиқим тупроқ ташладилар”.
Аҳмад ривояти.
Аввалгисида مِنْهَا خَلَقْنَاكُمْ яъни, “Биз сизларни ундан яратдик”, иккинчисида وَفِيهَا نُعِيدُكُمْ “Унга қайтарурмиз”, учинчисида эса وَمِنْهَا نُخْرِجُكُمْ تَارَةً أُخْرَى “Ва сизларни яна бошқаттан ундан чиқарурмиз”, дейди.
Бу Тоҳа сураси 55-оятидаги жумлалар бўлиб, оятнинг тўлиғи қуйидагича:
مِنْهَا خَلَقْنَاكُمْ وَفِيهَا نُعِيدُكُمْ وَمِنْهَا نُخْرِجُكُمْ تَارَةً أُخْرَى
“Биз сизларни ундан (ердан) яратдик, унга қайтарурмиз ва (қиёмат кунида) сизларни яна бошқаттан ундан чиқарурмиз”. Валлоҳу аълам!
