Пешин ва Аср намозлари
Ассалому алайкум! Ҳурматли устозлар, пешин билан аср номозларнинг фарзида, агар ёлғиз ўқиса, қироатини овоз чиқармай такбир жумлаларини овоз чиқариб ўқиш керакми ёки худди суннат сингари ўқиладими? Агар икки ёки уч киши бўлиб ўқисачи?
Ва алайкум ассалом! Ёлғиз намоз ўқувчи суннат намозлари каби ўқийди. Икки ёки уч киши бўлиб ўқишса, фақат такбирларнигина овоз чиқариб, қолганларини махфий ўқиши вожиб. Жаҳрий бўлган бамдод, шом ва хуфтонларни ёлғиз ўқувчи суннатни ўқигани каби ўқиши афзал. Гоҳо масжидларда жамоатдан кечикиб қолган кишилар ёлғиз ўзлари ўқисада, суннатларни ўқиётган кишиларга ҳалақит берадиган даражада овозларини чиқариб ўқишади. Биринчидан киши жамоатдан кеч қолгани учун ҳижолат бўлиши керак, айбини яшириши керак ва одамлардан ажраб, уларга ҳалақит бермайдиган ҳолатда намозларини адо қилиши керак. Мабодо “Менга бирортаси келиб иқтидо қилсин” деган умиди бўлса, келибю қўшилгандан кейин қироатни жаҳрий қилишга ўтади. Валлоҳу аълам.
