Диндан чиққанлар кейинчалик астойдил тавба қилса
Ассалому алайкум, устоз. Сизга яна бир саволим бор эди. Ҳозирги кунда кўпайиб кетган миссионерлик ҳаракати таъсирида диндан чиққан муртадлар кейинчалик астойдил тавба қилиб, Аллоҳнинг бирлигига иймон келтирсалар, тавбалари қабул қилинадими? Бир биродаримиз: «Бундай кимсалар тавба қилсалар ҳам, уларнинг дўзахийлиги аниқ, чунки Аллоҳ ширкни кечирмайди», деб айтиб қолдилар. Бу фикр қанчалик тўғри?
Бу масалага жуда ҳам диққат билан қараш керак. Аллоҳ таоло ширкни кечирмаслигини Қуръони Каримда очиқ айтиб қўйган. Лекин бу гап ширк келтирган ва ширкдан тавба қилмай ўтиб кетган одамларга тегишли. Аммо ширкдан кейин тавба қилинса, Аллоҳ кечиради. «Аллоҳ таоло ширкдан бошқа ҳамма гуноҳни кечиради, фақат ширкни кечирмайди» дегани «тавба қилмаса» деганидир. Яъни бу Аллоҳнинг хоҳишига боғлиқ, истаса ширк келтирмаганларнинг гуноҳини улар тавба қилмасалар ҳам кечириши мумкин. Аммо ширк келтирганларникини фақат тавба қилганларидагина кечириши мумкин. Бинобарин, адашиб, бошқа динга ўтиб қолганлар тавба қилсалар, Аллоҳ таоло уларни кечириши бор.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
