ЭМИКДОШЛИК (такрорий савол)
Аввало, гуноҳкор бўлиб қолмаслик учун шариатимизнинг ҳукмини билишга ва унга амал қилишга ҳаракат қилаётганингиз учун ташаккур. Бу сизларнинг бахтингиз ҳамдир. Бегона аёлни эмиш туфайли ҳалол ҳаромга боғлиқ ўта аҳамиятли ҳукмлар келиб чиқади.Одатда эмизишлик масаласи асосан ҳадис ва фиқҳ китобларимизда доимо никоҳга қўшиб зикр қилинади. Биз шарҳ қилаётган «Мухтасари Виқоя»да ҳам шундоқ бўлган.Эмизишлик фақат икки ярим йил ичида бир сўришлик билан собит бўлади.Бу муддатни Аллоҳ таоло Қуръони Каримда: «Ва унинг ҳомиласи ва кўкракдан ажратиши ўттиз ойдир», (Аҳқоф:15) деган оят билан белгилаб қўйган. Бу Абу Ҳанифа раҳматуллоҳи алайҳнинг ижтиҳодлари.Аммо имом Абу Юсуф ва Муҳаммадлар икки йил деганлар. Уларнинг далили «Волидалар болаларини икки тўлиқ йил эмизурлар. Ким эмизишни батамом қилишни хоҳласа», деган оятдир.Худди шу маъно Пайғамбаримиз соллаллоҳу алайҳи васалламнинг бир неча ҳадиси шарифларида ҳам таъкидланган. Демак, бола икки ёшидан кейин эмса, шаръий эмизиш собит бўлмайди.Агар бола онангизни бир марта эмган бўлса ҳам турмуш қуриб бўлмайди.
