Ташлаб кетилган чақалоқни боқиб олиш ҳақида.
Ассалому алайкум, Шайх ҳазратлари. Мени бир муаммо қийнамоқда. Яқинда касалхонанинг чақалоқлар бўлимида озгина шамоллаши борлиги туфайли 45 кунлик чақалоғимни олиб ётдим. Шу касалхонага бир чақалоқни ташлаб кетишган экан (қизалоқ тахминан 1 ойлик атрофида). Бу ҳақда хўжайиним эшитиб, «Чақалоқни уйга олиб кетамиз», демоқда. Ўзимизнинг 3 нафар фарзандимиз бор. Қизалоқ анчагина қаровсиз ҳолда. Бу ҳолат бизнинг қишлоқ шароитида жуда кам учрайдиган ҳолат. Бунга оила аъзоларимизнинг ҳаммаси рози. Хўжайиним: «Ким етимнинг бошини силаса, Жаннатда Расулуллоҳ соллаллоҳу алайҳи васаллам билан бирга бўлади», демоқда. У киши бу қизалоқни олиб, ўз фарзандимиздек тарбия қилиб, вояга етказиш ниятидалар. Мен у чақалоқни касалхонада эмизганман. Шайх жаноблари, биз маслаҳатингизга муҳтожмиз. Бу масалани сизнинг маслаҳатингизга қараб ҳал қилмоқчимиз. Жавоб учун олдиндан раҳмат.
- Ва алайкум ассалом! Жуда ҳам савобли иш бўлади. Сиз эмизган бўлсангиз, эмизикли қизингиз бўлибди. Келажакда ҳеч қандай муаммо бўлмайди. Одамларнинг гапларига эътибор берманглар. Қаровсиз қолган болаларни боқиш – жуда ҳам савобли иш. Эрингизга минг ташаккур. Жуда ҳам яхши мусулмон эканлар.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
