Йиғи намозни бузадими?
Ассалому алайкум, ҳурматли Шайх ҳазратлари! Саволим қуйидагича: охирги вақтда намозларимда Фотиҳа сурасини ўқиётганимда, намозимда дуо қилаётганимда ўзимдан-ўзим йиғлаяпман (балки бу бошимдан ўтказаётган қийинчиликларимдандир), ўзимни тўхтатолмай қоляпман. Бир биродарим бу нарса намозимни бузаётганини айтди, йиғи намозни бузадими? Жавобингиз учун раҳмат. Аллоҳ рози бўлсин. Омийн.
- Ва алайкум ассалом!
Бисмиллаҳир Роҳманир Роҳийм.
Агар намоз ичида охират учун овоз чиқариб йиғласа, намоз бузилмайди. Бунинг далили қуйидагича.
عَنْ مُطَرِّفٍ، عَنْ أَبِيهِ رَضِيَ اللهُ عَنْهُ قَالَ: رَأَيْتُ رَسُولَ اللهِ صَلَّى اللهُ عَلَيْهِ وَسَلَّمَ يُصَلِّي وَفِي صَدْرِهِ أَزِيزٌ كَأَزِيزِ الرَّحَى أَوِ الْمِرْجَلِ مِنَ الْبُكَاءِ. رَوَاهُ أَصْحَابُ السُّنَنِ.
Муторрифдан, у отаси розияллоҳу анҳудан ривоят қилади:
«Расулуллоҳ соллаллоҳу алайҳи васалламнинг намоз ўқиётганларини кўрдим. Кўксиларидаги йиғидан тегирмоннинг ёки қозоннинг овозига ўхшаш овоз чиқиб турар эди».
«Сунан» эгалари ривоят қилганлар.
Бошига тушган мусибат туфайли овоз чиқариб йиғласа, намоз бузилади.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
