Рўйхатдан ўтган парол ёки логинингизни ёзинг
Ижтимоий тармоқлар орқали киринг:
Ёки рўйхатдан ўтинг:
Исмингиз
Э.Почтангиз
Паролингиз
Паролни такрорланг
Рўйхатдан ўтиш тугмасини босишингиз билан сайтдан фойдаланиш қоидалари билан ҳам танишиб чиққан бўласиз

Қўшиқдаги ширк сўзни айтиб юриш.

13:27 / 04.12.2018 | izzat narimanov | 2532

Ассалому алайкум! Мен 5 махал намоз ўқийман, Аллоҳга минг шукр. Қўшиқ кўп эшитаман, биламан қўшиқ эшитиш гуноҳлигини. Мен эшитиб ҳиргоя қилаётган қўшиқларимни орасида ҳудди “мен Аллоҳга ўхшайман” деган сўзи бор экан. Мен у сўзни таржима қилиб кўрмагандим, яқинда шуни кўриб Астағфируллаҳ дедим. У қўшиқни мен кўп бора айтганман, устозлар мен нима қилай? Шу қўшиқларни ўчириб ташладим, тавба қиляпман, илтимос маслаҳат берсангиз катта раҳмат.


«Зикр аҳлидан сўранг» ҳайъати:

- Ва алайкум ассалом! Бошқа тилдагиларни қўйинг, ўзимизнинг тилда ҳам ширк ва куфр аралашган сўзлари бор қўшиқлар жуда кўп. Мусулмон киши оғзидан чиқаётган ҳар бир сўзга эътибор қаратиши керак.
Тилни қабоҳатли гап-сўзлардан тийиш ҳар бир инсон учун фарзи айндир. Чунки бу нарса катта гуноҳдир. 

  عَنْ أَبِي هُرَيْرَةَ رَضِي اللهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ  قَالَ: إِنَّ الْعَبْدَ لَيَتَكَلَّمُ بِالْكَلِمَةِ مَا يَتَبَيَّنُ مَا فِيهَا يَهْوِي بِهَا فِي النَّارِ أَبْعَدَ مَا بَيْنَ الْمَشْرِقِ وَالْمَغْرِبِ. رَوَاهُ الشَّيْخَانِ وَالتِّرْمِذِيُّ وَلَفْظُهُ: إِنَّ الرَّجُلَ لَيَتَكَلَّمُ بِالْكَلِمَةِ لَا يَرَى بِهَا بَأْسًا يَهْوِي بِهَا سَبْعِينَ خَرِيفًا فِي النَّارِ  

Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам:
«Банда бир калимани гапиради. Унда нима борлигини ажратмайди. У туфайли дўзахга – машриқ ва мағриб орасидан ҳам узоқроққа қулайди».
Икки шайх ва Термизий ривоят қилганлар.
Термизийнинг лафзида:
«Киши бир калимани гапиради. У бунда ҳеч гап йўқ, деб ўйлайди. У туфайли дўзахга етмиш йил қулайди», дейилган.
Шарҳ: Шунинг учун тилни тийиш керак. Оғзига келганни бўғзига ютмай гапиравериш керак эмас. Мўмин банда оғзидан чиқаётган ҳар бир сўзнинг жавобини беришини унутмаслиги зарур. Шу билан бирга, банда бир оғиз сўз билан дўзахи бўлиб қолиши ҳеч гап эмаслигини зинҳор эсдан чиқармаслиги керак. 

وَعَنْهُ عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: إِنَّ الْعَبْدَ لَيَتَكَلَّمُ بِالْكَلِمَةِ مِنْ رِضْوَانِ اللهِ لَا يُلْقِي لَهَا بَالًا يَرْفَعُهُ اللهُ بِهَا دَرَجَاتٍ، وَإِنَّ الْعَبْدَ لَيَتَكَلَّمُ بِالْكَلِمَةِ مِنْ سَخَطِ اللهِ لَا يُلْقِي لَهَا بَالًا يَهْوِي بِهَا فِي جَهَنَّمَ. رَوَاهُ الْبُخَارِيُّ وَالتِّرْمِذِيُّ وَلَفْظُهُ: إِنَّ أَحَدَكُمْ لَيَتَكَلَّمُ بِالْكَلِمَةِ مِنْ رِضْوَانِ اللهِ مَا يَظُنُّ أَنْ تَبْلُغَ مَا بَلَغَتْ فَيَكْتُبُ اللهُ لَهُ بِهَا رِضْوَانَهُ إِلَى يَوْمِ يَلْقَاهُ، وَإِنَّ أَحَدَكُمْ لَيَتَكَلَّمُ بِالْكَلِمَةِ مِنْ سَخَطِ اللهِ مَا يَظُنُّ أَنْ تَبْلُغَ مَا بَلَغَتْ فَيَكْتُبُ اللهُ عَلَيْهِ بِهَا سَخَطَهُ إِلَى يَوْمِ يَلْقَاهُ  

Яна ўша кишидан ривоят қилинади:
«Набий соллаллоҳу алайҳи васаллам:
«Албатта, банда Аллоҳнинг розилигига оид бир калимани гапиради. Унга эътибор ҳам бермайди. Аммо Аллоҳ бу туфайли ўша банданинг даражасини кўтаради.
Албатта, банда Аллоҳнинг ғазабига оид бир калимани гапиради. Унга эътибор ҳам бермайди. Аммо бу туфайли дўзахга қулайди», дедилар».
Бухорий ва Термизий ривоят қилганлар. Термизийнинг лафзида:
«Албатта, бирингиз Аллоҳнинг розилигига оид бир калимани гапиради. Унинг етадиган жойини гумон ҳам қилмайди. Аллоҳ бу туфайли унга Ўзига рўпара бўладиган кунгача ўз розилигини битади.
Албатта, бирингиз Аллоҳнинг ғазабига оид бир калимани гапиради. Унинг етадиган жойини гумон ҳам қилмайди. Аллоҳ бу туфайли ўша бандага у Ўзига рўпара бўладиган кунгача ўз ғазабини ёзиб қўяди», дедилар».
Шарҳ: Демак, бир оғиз сўз билан дўзахи ёки жаннати бўлиб қолиш ҳеч гап эмас экан. Шунинг учун ёмон гап-сўзлардан тилни тиймоқ ва яхши гап-сўзларнигина сўзлаб юрмоқ лозим экан. ("Ҳадис ва Ҳаёт" китобидан). Валлоҳу аълам!

Топ рейтинг www.uz Openstat