Эркак устунлиги

- Ва алайкум ассалом! Сизни саволингиз эркак билан аёл яратилишида бир биридан фарқ қилиб яратилганлиги муҳим рол ўйнашини билмаганликдан, шариат аёлларга қанчалар шараф берганини билмаганликдан, сиз турган жамиятда эр аёлни ҳуқуқларини поймол қилаётганлигини кўраётганингиздан, аёл шариат берган ҳуқуқларини билмаганлигидан, аёлга ҳақиқий шараф нима эканлигини ажратолмаганликдан ва энг асосийси ўлимдан кейин абадий ҳаёт борлиги эътибордан четда қолаётганидандир. 1-дан Аллоҳ таоло ҳикмат билан аёлни эркакдан ақл борасида ҳам жисмоний қувват борасида ҳам нозик қилиб яратди. Бунинг сабаби икки бир бири билан ҳар жиҳатдан тенг бўлган шахс бири бошқасига итоат қилмайди. Ҳар ким ўз устунлигига эришишга ҳаракат қилади. Табийки бундай ҳолатда иккисининг бир жойда туриши, бир биридан тўғри фойдалана олиши мумкин эмас ёки ўта самарасиз бўлади. Эркак шарафли бўлиши учун кучли, ҳимояловчи, таъминлай олувчи  ва бошқарувчи бўлишлиги керак. Аёл эса шарафли бўлиши учун нима мақсадда яратилган бўлса ўша ишларни аъло даражада бажариб қўйиши керак. Фарзанд кўриш, уни тарбиялаш, эрни ножоиз алоқалардан сақлаб қолиш ва энг яқин бўлган турмуш ўртоғи-фарзандларини хизматида бўлиши. Жамиятга соғлом, покиза табиятли, билимдон ва гўзал хулқли инсонларни етиштириб бериш. Эвазига эса Имом Аҳмад Абдурроҳман ибн Авф розияллоҳу анҳудан ривоят қилган ҳадисда Пайғамбаримиз алайҳиссалом: «Агар қайси бир аёл беш вақт намозини ўқиса, бир ой рўзасини тутса, фаржини сақласа ва эрига итоат қилса, унга: «Жаннатнинг қайси эшигидан хоҳласанг, киравер», дейилади», – деган мақомга эришишдир. Валлоҳу аълам!