Истиғфор
Ассалому алайкум! Абу Ҳурайра розияллоҳу анҳудан ривоят қилинишича, ўлганидан кейин маййитнинг даражаси кўтарилади. Шунда у: «Эй Роббим, бу нима?» дейди. Унга “боланг истиғфор айтди” дейилади. Азиз устозлар ушбу ҳадисдан нимани тушунишимиз керак? Яқинда отам омонатини топширдилар. Жойлари жаннатдан бўлсин илоҳим. Истиғфор айтиб отамга бағишлашим керакми шунда? Ёки истиғфорда бардавом бўлсам отамнинг руҳларига етиб бораверадими ўзи? Истиғфор айтишда сони ҳам борми?
– Ва алайкум ассалом! Ушбу ҳадиси шарифда инсон вафот этиб, амал қилишдан тўхтаганидан кейин ҳам даражаси ошиши мумкинлиги хабари берилмоқда. Фарзанд ота-онаси учун истиғфор айтса, яъни уларнинг гуноҳларини кечирилишини сўраб дуо қилса, шу амалининг манфаати уларга етиб борар, уларнинг даражалари кўтарилар экан. Шу билан бирга фарзанд ҳам ота-онасига қилган бу дуоси учун улуғ ажрлар олиши шубҳасиздир. Чунки ота-она учун дуо қилиш уларга яхшилик қилишдир. Улар айниқса вафотларидан сўнг шундай яхшиликларга жуда мухтож бўладилар. Валлоҳу аълам!
