Нажосат кийимга тегса
Ассалому алайкум! Сийдикни тангадан кичикроқ томчиси кийимга тегса намоз ўқиса бўладими? Бир имом бўлмайди деди. Нажосат иккига бўлинади молнинг тезаги тангадан кичик бўлган холатда тегса намоз ўқиб бўлади, одамнинг сийдиги қандай кичикликда бўлишидан қатъий назар ўқиб бўлмайди деди. Шу тўғрими?
– Ва алайкум ассалом! Сийдик чиқиши билан таҳорат кетади, оз кўпининг фарқи йўқ. Буни билсангиз керак. Сийдик чиқди, кийимга тангадан кичикроқ ҳажмда тегди, ўша ҳолатда таҳорат олиб намоз ўқиди. Шунда намоз адо бўлади.
"Кифоя" китобидан иқтибос:
Ундан (оғир нажосатдан) дирҳам миқдори афв қилинади. У қуюқ нажосатда бир мисқол, суюқда кафт миқдоричадир.
Ушбу миқдоргача бўлган оғир нажосат теккан кийим ила намоз ўқиса жоиз. Ундан ортганда ўқиб бўлмайди. Оз миқдордаги нажосатдан сақланиш қийин бўлганидан бунга рухсат берилган. Дирҳамнинг оғирлиги 2,975 грамм. Валлоҳу аълам!
