Намоз ўқишни истайдилар аммо...
Ассалому алайкум! Турмуш ўртоғим намоз ўқишни истайдилар аммо давлат ишида ишлаганлари сабабли 5 маҳал намозни барчасини ўз вақтида адо этолмайдилар. Уларга намозни бошлайверинг Аллоҳ ўзи ёрдам беради десам унамаяптилар. Намоз ўқимаган кишининг гуноҳи доимий 3 маҳал намозни қазо қиладиган кишининг гуноҳидан камроқ дейдилар. Бу қанчалик тўғри? Турмуш ўртоғим агар шу саволга ижобий жавоб олсанг иншааллоҳ эртаданоқ намозни бошлайман дедилар. Илтимос тўғри йўл кўрсатинглар.
– Ва алайкум ассалом! Албатта тўғри. Бамдод ва хуфтонни жамоат билан ўқиган тунни уйқусиз ибодат билан ўтказган билан баробар дейилган. Қиёматда бамдод ва хуфтонни ўқимаганлик азобидан қутилиб қолади. 5 сўм қарзи бор одам 2 сўмини адо қилса 3 сўм қарзи қолиши билан бир хил. Қолганини ўқимасанг ўқиётганингни ҳам ўқимаслик керак деган нарса бу тиззасигача ахлатга тушиб қолган кишини бутунлай ахлатга кўмиб юбориш билан бир хил. Валлоҳу аълам!
