Инфоқ қилиш ҳақида
Бақара сурасида: «Ва сендан нимани нафақа қилишни сўрарлар. «Ортиқчасини», деб айт», дейилган. Расулуллоҳ соллаллоҳу алайҳи васаллам бир ҳадисларида «Садақанинг афзали инсон ўзи кўз тикиб турган бойлигини қашшоқликдан қўрқиб турганда беришидир» деган маънода гапирганлар. Тарихда Абу Бакр бутун бойликларини садақа қилиб юбориб, Аллоҳ ва Расулини ўзларига қолдирганликлари бизга маълум.
1. Юқоридаги қавлларни қандай тушунишимиз лозим?
2. Ҳазрати Абу Бакр Сиддиқнинг бутун бойликларини инфоқ қилганларини-чи?
Ташқаридан қараганда қарама-қарши бўлиб кўринган бундай амалларнинг барчаси вазиятни эътиборга олиб иш кўриш чорасидир. Очарчилик шиддатли бўлган пайтларда борини бериш керак бўлади. Вазиятга қараб ҳазрати Абу Бакр розияллоҳу анҳу каби бутун бойлигини бериш ҳам мумкин. Тўқчилик ва фаровонлик пайтида ўзидан ортганини берса яхши бўлади.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
