Ит боқиш ва унга эшак гўштини едириш ҳақида
Ассалому алайкум! Ҳурматли устозлар, Аллоҳ илмингизни зиёда қилсин. Бир яқинимиз ит боқишга ишқибоз. Ҳамда ўз уйини ҳимояси учун ҳам боқади. Шу ўринда бир савол билан мурожаат қилиб қолди. Эмишки, айни пайтда итини боқиш мақсадида эшак гўштини сотиб олиб ёки эшакни сўйдириб едираётган экан. Шу иши ҳақида сўраб, сиз Устозлардан аниқлик киритиб беришингизни илтимос қилиб қолди. Шариатимизда эшак гўштини сотиб олиб ёки эшак сўйдириб итларга едириш мумкинми? Агар у ит уй қўриқлаш учун бўлса ёки ишқибозчилик учун боқилаётган бўлса? Жавобингиз учун олдиндан ташаккур!
Ва алайкум ассалом!
عَنْ أَبِي هُرَيْرَةَ رَضِي اللهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: مَنِ اقْتَنَى كَلْبًا لَيْسَ بِكَلْبِ صَيْدٍ وَلَا مَاشِيَةٍ وَلَا أَرْضٍ فَإِنَّهُ يَنْقُصُ مِنْ أَجْرِهِ قِيرَاطَانِ كُلَّ يَوْمٍ. رَوَاهُ مُسْلِمٌ والْبُخَارِيُّ. وَلَفْظُهُ: مَنْ أَمْسَكَ كَلْبًا فَإِنَّهُ يَنْقُصُ كُلَّ يَوْمٍ مِنْ عَمَلِهِ قِيرَاطٌ إِلَّا كَلْبَ غَنَمٍ أَوْ حَرْثٍ أَوْ صَيْدٍ
Абу Ҳурайра розияллоҳу анҳудан ривоят қилинади: «Набий соллаллоҳу алайҳи васаллам: «Ким ов ити, чорва ити ва зироат ити бўлмаган итни сақласа, албатта, унинг ажридан ҳар куни икки қийрот ноқис бўлади», дедилар». Муслим ва Бухорий ривоят қилганлар. Бухорийнинг лафзида: «Ким ит сақласа, албатта, унинг амалидан ҳар куни бир қийрот ноқис бўлади. Чорва ёки зироат ёки ов ити мустасно», дейилган. Шарҳ: Исломда ит боқишга учта сабаб туфайли рухсат берилган: 1. Ов учун ит боқса бўлади. 2. Экинзорларни қўриш учун ит боқса бўлади. 3. Қўй ва бошқа ҳайвонларни қўриш учун ит боқса бўлади. Умумий қилиб айтганда, қўриқчи итларни боқса бўлади. Ҳозирги пайтларда баъзи изқуварлик ёки нарсаларни ҳидлаб, билиш учун ишлатилаётган итлар ҳам қўриқчилик учун ушлаб туриладиган итлар қаторига киради. Бошқа мақсадлар учун ит ушлаб туриш шариатга хилоф саналади. Чунки ит нажас нарса. Ялаган, ҳидлаган нарсаларини ҳам нажасга айлантиради. У нажас нарсаларни егани учун оғзида ўта заҳарли микроблар кўп бўлади. Бунинг устига, ит вақти-бемаҳал ҳуриб, кишиларни безовта қилади, уларга озор беради. Бўшалиб кетган итлар эса кишиларни қопиб олиши, турли жароҳатларга, касалликларга ва ҳатто қутуриб қолишга сабаб бўлиши мумкин. Шу маънода турли жамиятда тез-тез итларни қириб ташлаш ишлари олиб бориб турилиши ҳам бунинг исботидир. ("Ҳадис ва Ҳаёт" китобидан). Валлоҳу аълам!
