Дуодан сўнг қўлларни юзга суриш ҳақида
Ассалому алайкум, устоз, яна бир саволимизга жавоб берсангиз.
Бир қори биродаримиз: «Пайғамбаримиз Муҳаммад соллаллоҳу алайҳи васаллам қўл очиб дуо қилганларида, дуони тугатгач, қўлларини юзларига сурар эдилар», деган эди. Лекин «Саҳиҳул Буxорий»да ўқишимизча, юзларига сурганликлари ҳақида ҳадис келмаган. Шунга аниқлик киритиб берсангиз. Юзга суриш керакми ёки сурмаслик? Аллоҳ сиздан рози бўлсин.
Бисмиллаҳир Роҳманир Роҳийм.
- Ва алайкум ассалом!
عَنْ عُمَرَ رَضِيَ اللهُ عَنْهُ قَالَ: كَانَ رَسُولُ اللهِ صَلَّى اللهُ عَلَيْهِ وَسَلَّمَ إِذَا رَفَعَ يَدَيْهِ فِي الدُّعَاءِ لَمْ يَرُدَّهُمَا حَتَّى يَمْسَحَ بِهِمَا وَجْهَهُ. رَوَاهُ أَبُو دَاوُدَ وَالتِّرْمِذِيُّ.
Умар розияллоҳу анҳудан ривоят қилинади:
«Расулуллоҳ соллаллоҳу алайҳи васаллам қачон дуода икки қўлларини кўтарсалар, уларни юзларига суртмасдан туриб қайтармас эдилар».
Абу Довуд ва Термизий ривоят қилганлар.
Дуонинг одобларидан бири – икки қўлни кўтариб дуо қилгандан кейин қўлларни юзга суртишдир. Бу ҳақдаги ҳадисларни Бухорийдан бошқа кўпчилик муҳаддислар ривоят қилганлар.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
