Чалқанча ётиш мумкинми?

Бисмиллаҳир Роҳманир Роҳийм.
- Ва алайкум ассалом!

ЧАЛҚАНЧА ЁТИШ

عَنْ عَبَّادِ بْنِ تَمِيمٍ، عَنْ عَمِّهِ (هُوَ عَبْدُ اللهِ بْنُ زَيْدٍ بْنِ عَاصِمٍ الْمَازِنِيُّ) قَالَ: رَأَيْتُهُ - قُلْتُ لاِبْنِ عُيَيْنَةَ: النَّبِيَّ صَلَّى اللهُ عَلَيْهِ وَسَلَّمَ؟ قَالَ: نَعَمْ - مُسْتَلْقِيًا وَاضِعًا إِحْدَى رِجْلَيْهِ عَلَى الْأُخْرَى. رَوَاهُ الْبُخَارِيُّ فِي الْأَدَبِ الْمُفْرَدِ.

Аббод ибн Тамиймдан, у амакиси (Абдуллоҳ ибн Зайд ибн Осим ал-Мозиний)дан ривоят қилади: «Ул зотни кўрдим», деган эди, Уяйнага: «Набий соллаллоҳу алайҳи васалламними?» дедим. У: «Ҳа, чалқанча тушиб, бир оёқларини иккинчиси устига қўйиб ётганларини», деди».

Имом Бухорий «Адабул муфрад»да ривоят қилган.

Демак, чалқанча ётиш жоиз бўлиб, бу иш Расулуллоҳ соллаллоҳу алайҳи васалламдан собит бўлган экан. Бундай ҳолда ётишни ман қилган ривоятларда аврат очилиб қолиши эҳтимоли кўзда тутилганлигини уламоларимиз алоҳида таъкидлаганлар.

عَنْ أُمِّ بَكْرٍ بِنْتِ الْمِسْوَرِ، عَنْ أَبِيهَا قَالَ: رَأَيْتُ عَبْدَ الرَّحْمَنِ بْنَ عَوْفٍ مُسْتَلْقِيًا رَافِعًا إِحْدَى رِجْلَيْهِ عَلَى الْأُخْرَى. رَوَاهُ الْبُخَارِيُّ فِي الْأَدَبِ الْمُفْرَدِ.

Умму Бакр бинт Мисвор отасидан ривоят қилади:

«Мен Абдурраҳмон ибн Авфнинг бир оёғини иккинчиси устига қўйиб, чалқанча ётганини кўрдим».

Имом Бухорий «Адабул муфрад»да ривоят қилган.

Абдурраҳмон ибн Авф Расулуллоҳ соллаллоҳу алайҳи васалламга бардавом ҳамсуҳбат бўлган улуғ саҳобалардан ҳисобланадилар. Шундай улуғ зотлар нима иш қилган бўлсалар ҳам, буни албатта Расулуллоҳ соллаллоҳу алайҳи васалламдан кўрган бўладилар.

Валлоҳу аълам.

Дин ишлари бўйича қўмитанинг хулосаси рақами: 2022 йил 03-07/1077