Вакциналарнинг жуда кўплиги шубҳаларга олиб бормоқда
Ассалому алайкум, ҳурматли Устоз. Мен эмлаш тўғрисидаги жавобларингизни, жуда кўп маълумотларни ўқиб чиқдим. Менинг кўнглимда жудаям жиддий ғашлик пайдо бўлди. «Уларни қилдириш керак», деган экансиз. Лекин шубҳали нарсалардан узоқ бўлишимиз кераклиги ҳақида ҳам яхши биламиз. Вакциналарнинг қандай тайёрланиши, нималардан олиниши ҳақида маълумотлар ўқидим. Авваламбор Аллоҳ билади. Ожизона илмим билан бир хаёлга бораман, яъни Дажжол икки нарса билан келади – бири Жаннат, бири Дўзах. Шу вакциналар ҳам Дажжолнинг «Жаннат»и эмасмикан? Балки эмлашни тарк этиб, биз Аллоҳнинг Жаннатига эришмасмиканмиз? Шу саволлар мени қийнамоқда. Вакциналарнинг орқасидан катта пул ишлайдиганлар борлиги, вакциналар сабабидан саратон, бепуштлик каби касалликлар келиб чиққанлиги ҳақида ва бундан бошқа кўп сабаблар борлиги тўғрисида маълумотлар ўқидим. Унга кўп тарғиб қилишади.
Аборт ҳақида ҳукм чиқаришингизда учта табибнинг фикри бир хил бўлса, бўлади, дегансиз. Вакциналар тўғрисида ҳам кўп табиблар текширувлар натижасида ёмон фикрга келишган. Ҳозирги вакциналарнинг ҳам жуда кўплиги шубҳаларга олиб бормоқда. Шунинг учун Аллоҳга таваккул қилсак, тўғри бўлмайдими?
Бисмиллаҳир Роҳманир Роҳийм.
- Ва алайкум ассалом! Бу менинг гапим эмас. Мусулмон уламолар жумҳури қабул қилган қарор. Ўша қарорнинг матнини ҳам эълон қилганмиз. Шунингдек, мазкур эмлаш дориларини ўша сиз айтган «дажжоллар» ўз фарзандларига ҳам қиладилар. Сизни ҳеч ким мажбур қилаётгани йўқ. Хоҳламасангиз, болаларингизга қилдирмай қўяверинг.
Шу ўринда сиз таваккул қоидаларига ҳам хилоф қилишга чақираётганингизни эслатиб қўйишни бурчим деб биламан.
عَنْ أَنَسٍ رَضِيَ اللهُ عَنْهُ أَنَّ رَجُلًا قَالَ: يَا رَسُولَ اللهِ، أَعْقِلُهَا وَأَتَوَكَّلُ أَوْ أُطْلِقُهَا وَأَتَوَكَّلُ؟ قَالَ: «اعْقِلْهَا وَتَوَكَّلْ». رَوَاهُ التِّرْمِذِيُّ.
Анас розияллоҳу анҳудан ривоят қилинади:
«Бир киши: «Эй Аллоҳнинг Расули, (уловимни) тушовлаб туриб таваккул қилайми ёки қўйвориб таваккул қилайми?» деди. У зот: «Уни тушовлаб туриб, кейин таваккул қил», дедилар».
Термизий ривоят қилган.
Бу ҳадиси шарифдан таваккул қилиш билан бирга, сабаб бўладиган ишларни ҳам пухта равишда олиб бориш лозимлиги келиб чиқади. Чунки таваккул – қалб иши, бу нарса банданинг қалбига, нияти ва эътиқодига боғлиқ амалдир. Воқеликдаги ишларнинг юзага келиши эса Аллоҳ таоло томонидан жисмга ва унинг аъзоларининг амалига боғлиқ қилинган.
عَنْ مُعَاوِيَةَ بْنِ قُرَّةَ، أَنَّ عُمَرَ بْنَ الْخَطَّابِ، أَتَى عَلَى قَوْمٍ فَقَالَ: مَا أَنْتُمْ؟ فَقَالُوا: نَحْنُ الْمُتَوَكِّلُونَ، فَقَالَ: بَلْ أَنْتُمُ الْمُتَّكِلُونَ، أَلَا أُخْبِرُكُمْ بِالْمُتَوَكِّلِينَ؟ رَجُلٌ أَلْقَى حَبَّةً فِي بَطْنِ الْأَرْضِ، ثُمَّ تَوَكَّلَ عَلَى رَبِّهِ. رَوَاهُ الْبَيْهَقِيُّ فِي «شُعَبِ الْإِيمَانِ».
Муовия ибн Қурра розияллоҳу анҳудан ривоят қилинади:
«Умар ибн Хаттоб бир гуруҳ одамларга дуч келиб, «Сизлар кимсизлар?» деб сўради. «Таваккул қилувчилармиз», дейишди. «Йўқ! Сизлар текинхўрларсиз. Таваккул қилувчи олдин донни ерга сепиб қўйиб, кейин Аллоҳга таваккул қилади», деди».
Байҳақий «Шуъабул иймонда» ривоят қилган.
عَنِ ابْنِ عَبَّاسٍ رَضِيَ اللهُ عَنْهُ قَالَ: كَانَ أَهْلُ الْيَمَنِ يَحُجُّونَ وَلَا يَتَزَوَّدُونَ، وَيَقُولُونَ: نَحْنُ الْمُتَوَكِّلُونَ، فَإِذَا قَدِمُوا مَكَّةَ سَأَلُوا النَّاسَ، فَأَنْزَلَ اللهُ تَعَالَى: «وَتَزَوَّدُوا فَإِنَّ خَيْرَ الزَّادِ التَّقْوَى». رَوَاهُ الْبُخَارِيُّ.
Имом Бухорий Абдуллоҳ ибн Аббос розияллоҳу анҳудан ривоят қиладилар:
«Яман аҳли озиқа ғамлаб олмай ҳаж қилишар ва: «Биз таваккул қилувчилармиз», дейишарди. Маккага келишганида эса одамлардан тиланишар эди. Шунда Аллоҳ таоло «Озуқа ғамлаб олинг. Энг яхши озиқа эса тақводир...» оятини нозил қилди».
Бир ривоятда айтилишича, яманликлар «Аллоҳнинг уйини ҳаж қиламиз-у, бизни оч қўярмиди», дейишар экан.
Бу, албатта, ҳар бир нарсага тайёргарлик кўриб юришга буюрадиган Ислом таълимотига хилофдир.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
