Имом Абу Ҳанифа китобидан
Ассалому алайкум! Ҳилол нашрининг “Имом Аъзам” номли китобининг 74-бетида имом Азъам гоҳида бир ракатда гохида бир кечада гохида уч кунда Қуръонни хатм қилган дейиляпти. Қандай қилиб бир ракатда хатм қилиш мумкин? Уч кундан ози мумкин эмаску, бу нарса ёлғонми?
– Ва алайкум ассалом! Сиз билан биз вақтни узунасини биламиз. Узунаси бу 24 соатдир, Аллоҳ таоло баъзи бир бандаларига вақтнинг энини ҳам берар экан. Муҳаммад Ҳасан Дедду(ҳозирги кундаги тирик шахс, ҳазратимиз раҳимаҳуллоҳ у кишини жуда кўп мақтар эдилар, бутун ҳадис заҳираси у кишига ёд бўлган деб айтишади) ўз бобоси ҳақида ҳикоя қилиб, “Ярим соатда етти пора Қуръон ўқир эди” деганлар. Ўзимиз гувоҳи бўлган қанча-қанча кишилар бор хуфтонни ҳарами шарифда ўқиб, чиқиб кетмасидан бамдодгача икки ракъат нафлга ният қилиб Қуръонни хатм қилганлар. Ҳозирги кунда кўп китоб ёзганлар мундарижасида бир неча олимларнинг исмлари келтирилган. Уларни ёзган китоблари билан яшаган умрларини солиштирилса ёзган китоблари яшаган вақтларига тўғри келмайди. Лекин бу ҳақиқат. Энг ёрқин мисол Расулуллоҳ соллаллоҳу алайҳи васалламнинг бир кечада меърожга чиқиб, жаннату дўзах ва ундаги нарсаларни кўриб тушганидир. Уч кунда хатм қилиш бу омматан инсонга тегишли. Хослар бундан мустасно. Валлоҳу аълам!
