Хажга борганда гуноҳлар бутунлай ювуладими?
Ассалому алайкум! Билмай катта кичик гуноҳ қиламиз ва унга доим тавба қилиб юраман. Билиб билмай қилган гуноҳларим учун астағфируллоҳни кўп айтаман. Назаримда етмаяткандек бўлади. Қуръон ўқиёткан пайитимда жуда ҳам енгил бўлиб худди Аллоҳ мени кечиргандек хис қиламан, дуо қилятканимда ҳам. Шу пайиткача нима дуо қилиб сўраган бўлсам беряпти. Лекин олдин қилган гуноҳларимдан Аллоҳни олдида уяляпман. Аллоҳ чақирса хажга борса гуноҳлари буткул ювилади деган гапни эшиткан эдим. Шу тўғрими? Хажга Аллоҳ учун, Унинг розилиги учун борилади. Шунда гуноҳлардан хам халос бўлиб, янги туғулган чақалоқдек бегуноҳ бўладими? Олдин қилган гуноҳларим ичимни еб битиряпти хар намозимда тавба қиламан. Шу хажга борса гуноҳини кечирадими Алллоҳ деган саволга қийнайди.
– Ва алайкум ассалом! Бу шайтоннинг васвасаси. Сиз астойдил тавба қилинг ва ҳаётингизни давом эттиринг. Гуноҳга тавба қилгандан кейин эсга тушса истиғфор айтиш керак. Астойдил тавба қилгандан кейин эзилавериш керакмас. Бу Аллоҳ таолонинг Ғаффор сифатини менсимасликка киради. Инсон чин дилдан бир бора тавба қилса, албатта Аллоҳ таоло унинг гуноҳини кечиради. Чунки Қуръони Карим ва ҳадис шарифларда, тавба қилувчининг гуноҳи кечирилиши ҳақида Аллоҳ таоло ва Расулуллоҳ соллаллоҳу алайҳи васаллам ваъда берганлар. Аллоҳ таоло ваъдасига хилоф қилувчи Зот эмас. Чин дилдан тавба қилгандан кейин гуноҳини эслаб эзилавериш Аллоҳ таолонинг “Ғаффор” яъни ўта мағфиратли эканлигини қадрламаслик бўлади. Сиз улуғ бир инсоннинг оёғини босиб олсангиз ва чин дилдан, самимий кечирим сўрасангиз, у киши кечиришини айтса, сиз яна қайта-қайта кечирим сўраверишингиз у кишининг ўта кечиримсиз, гиначи ва пасткашга чиқарган бўласиз. Қолаверса шайтон Одам алайҳиссаломга душман бўлди ва қиёматгача келадиган фарзандларидан қасос олишга қасам ичди.
Аллоҳ таоло “Сод” 82-83-оятларида марҳамат қилади :
قَالَ فَبِعِزَّتِكَ لَأُغْوِيَنَّهُمْ أَجْمَعِينَ إِلَّا عِبَادَكَ مِنْهُمُ الْمُخْلَصِينَ
82. У: «Сенинг иззатинг ила қасамки, мен уларнинг барчасини йўлдан оздиражакман.
83. Улардан танланган бандаларинггина мустасно», – деди.
Иблис Аллоҳ таолонинг иззати ила қасам ичиб, Одам болаларини қиёмат кунигача иғво қилишни қасд этди. Шу билан бирга, Аллоҳга ихлос қилган, Аллоҳ таоло танлаб олган бандаларга иғвоси таъсир қилмаслигини ҳам айтиб қўйди. Инсонни шайтоннинг иғвосидан сақловчи қалқон унинг Аллоҳга ихлос билан ибодат қилишидир. Аллоҳга ихлос билан ибодат қилмаганлар эса иблиснинг иғвосига учраши турган гап. Иблиснинг иғвосига учганларнинг оқибатини Аллоҳ таоло ўша пайтдаёқ эълон қилиб қўйган. ("Тафсири Ҳилол" китобидан).
Шайтоннинг табиати худди жирканч бир кишига сиз тарафингиздан бир хатолик ўтса, у ҳадеб сизни айбингизни юзингизга солиб, эзиб тушкунликка туширгани кабидир. Сиз бунга ҳеч парво қилманг. Валлоҳу аълам!
