Қолдирилган намозда азон ва иқомат

Ассалому алайкум! Бизнинг орамизда камида 30 йиллик қазо намозлари бўлганлар кўпчиликни ташкил этади. Аллоҳ бизларни мағфират қилсин. Мана шу биродарларимга қазо намозларини кўпроқ ва тезроқ ўқиб тугатишлари учун "Хисоб-китоб куни биздан намозларимиздан хисоб бўлади. Азон ва иқоматлардан эмас. Шунинг учун қолдирилган намозларни хар бирига азон ва иқоматларни айтиб вақт ўтказмасдан тезроқ намозларни ўқиб тугатган афзал" деб гапириб юборган эдим. Бундай дейишимга сабаб эса азон ва иқоматни айнан намознинг фарзларида топмаганим эди. Мен бу гапларни қолдирилган намозларини тезроқ тугатишлари учун тавсияни кўзлаган эдим. Менинг айтган гапларим тавсия хисобланадими ёки фатвони ўрнига ўтиб қоладими? Умуман ўзимни фатво беришга хақлиман деб хисобламайман. Агар фатво бўлиб қолган бўлса (Астағфируллох) мана шу нотўғри фатво берганим учун қандай тавба қилишим керак?