Мен нима қилишим керак?

Мусофирлигимда, шароитим яхши бўлсада, бузуқ жамиятдан зериккан эдим. Ота-онам ватанда деб таваккал бир кунимни кўраман деб қайтгандим. Эндиликда ватанга қайтгач, ишхонада намоз ўқиш осонмас, Шерлок Холмсга ўхшаб намозга имкон қидириб юраман. Қолаверса, ёшим уйланишга етиб қолгани учун кўпчилик томондан қистовга олинганман. Аммо ҳозирги ойлигим бир оилани боқадиган даражада эмас. ИншаАллоҳ яқин йилларда яхши бўп кетар. Лекин узоқ кутиб юриш ниятим ҳам йўқ, кечикиб кетяпти. Алҳамдуллиллаҳ, Аллоҳ ақл фаросатдан сийлаган - олий маълумотим бор, хорижда университетни битириб қайтдим. Аммо, ватанда қалбим хотиржам бўлсада, лекин айтганимдек ўзимни ҳар томонлама сиқилгандек ҳис қиляпман. Инсонни қадри пули билан бўлиб қолгандек гўё. Натижада намозларда сифат, хушуъ кетган. Хорижда намозларимда сифат бор эди, қабул эканлигига ишонардим. Хозир бундай деёлмайман. Буларнинг ҳаммаси мени руҳан эзади. Мен нима қилишим керак?