Истихора дуоси ҳақида

16:32 / 10.01.2015 | Zafar Yuldashev | 6144

Опамнинг саволи қуйидагича: “Бир аёл менга истихора фақат кечаси ўқилмайди, уни хоҳлаган вақтида ўқиса бўлади. Масалан бозорга боришдан олдин ва яна бошқа ишлардан олдин. Истихорада туш қўриш нотўғри ва у 7 кеча ўқилмайди, истихора дуосидаги "ушбу иш" дейилгандан кейин ҳожатини айтиш керак” деди. Мени араб тилидан озгина хабарим бор. Сизнинг “Ҳадис ва ҳаёт” китобингизнинг 7-жузида истихора хақида ўқидим. Бу китобдаги арабча матнда "ҳазал амру"дан кейин ҳожат сўралиши йўқ ва бу охирида "йусамми ҳаажатаҳу" бўлиб келган. “Ал-АЗКОР” китобида бу дуонинг арабча матнида "ҳазал амру"дан кейин ҳожат айтилиши кераклиги ёзилмаган. Дуонинг охирида "йусамми ҳаажатаҳу" ёзилган, аммо ўзбекча таржимасида "ҳазал амру"дан кейин ҳожат айтилиши қавс ичида ёзилган. Дуо охиридаги "йусамми ҳаажатаҳу" таржима қилинмаган. Савол; 1. Ҳожат истихора дуосининг қаерида айтилиши керак? 2. Туш кўриш нотўғрими? 3. Истихора қай вақтда ўқилади? 4. Истихорада “Кафирун” ва “Ихлос” сураларини айтиш шартми ёки бошқа сураларни ҳам айтса,бўладими? 5. 7 Кеча ўқиш ҳақидаги гап тўғрими?

Шайх Муҳаммад Содиқ Муҳаммад Юсуф роҳимаҳуллоҳ:

Истихора намози «Истихора» сўзи луғатда хайрни талаб қилиш, деган маънони англатади. Мусулмон киши икки ишдан қайси бирини қилишини билмай қолганда, хайрлисини танлаш учун Истихора намози ўқийди. Бу намозни ҳар бир мубоҳ ишдан олдин ўқиш мустаҳабдир. Жобир розияллоҳу анҳудан ривоят қилинади: «Пайғамбар соллаллоҳу алайҳи васаллам бизга ҳамма ишларда истихора қилишни худди Қуръондан сурани таълим бергандек таълим берар эдилар. У зот: «Қачон бирингиз бир иш қилмоқчи бўлса, фарз намоздан бошқа икки ракъат намоз ўқисин. Сўнг, Эй, бор Худоё! Албатта, мен Сендан илминг ила истихора қиламан. Сенинг қудратинг ила қудрат сўрайман. Сендан улуғ фазлингдан сўрайман. Албатта, Сен қодир бўлурсан, мен қодир бўлмасман. Сен билурсан, мен билмасман. Сен ғайбларни ўта яхши билувчи зотсан. Эй, бор Худоё! Агар ушбу иш менга динимда, маошимда ва ишим оқибатида яхши эканлигини билсанг (ёки ҳозирги ишимдаю, келгусида) уни менга тақдир қилгин, менга осон қилгин, сўнгра уни мен учун баракали қилгин. Агар ушбу иш мен учун динимда, маошимда ва ишим оқибатида (ёки ҳозирги ишимдаю келгусида) ёмон эканлигини билсанг уни мендан буриб юбор, мени ундан буриб юбор. Ва менга қаерда бўлса ҳам яхшиликни тақдир қил. Сўнгра мени унга рози қил, десин ва ҳожатини айтсин», дедилар». Бешовларидан фақат Муслим ривоят қилмаган. Ушбу намозни ўқигандан кейин мазкур иш ҳақида ўйламай, Аллоҳ ихтиёр қиладиган нарсани кутиб юради. Кейин кўнглига тушиб, ўзига маъқул бўлиб қилгиси келиб қолса қилади. Бу ҳақда туш кўриши ҳам мумкин. Агар иш бир тарафга бўлмай туриб қолса истихора намозини яна қайтадан ўқийди. Қайта ўқиш етти мартагача бўлади. Истихора намозининг биринчи ракъатида «Фотиҳа» сурасидан кейин «Кофирун» сурасини, иккинчи ракъатда «Ихлос» сурасини ўқийди.