Савоб умидида

Совуқ мавсумларда шаҳримизда электр таъминоти узилиши туфайли светофорлар кўпинча ишламай туради. Бу кўпчиликнинг моддий ва жисмоний зарар кўришига, инсонлар ўлимига олиб келади. Ҳамма ўзича нолиб кетаверади. Асли бу давлатимиз мутасадди ташкилотлари (электр таъминоти корхонаси, ҳокимият, ДАН) нинг вазифаси эканини яхши биламан. Бундай ҳолатларни бартараф этиш учун асосий чорраҳаларга вақтинча электр таъминоти берувчи аккумуляторлар сотиб олиб ўрнаттириш таклифи берилса, улар бундай имкониятлари йўқлигини, бюджет сметасида бундай сарф-ҳаражатлар кўрсатилмаганлигини айтишади. Бу масалани ҳал қилишни шу мутасаддилардан талаб қилишни кучайтириш бошқа шаҳарлар учун ҳам фойдали бўлишини ўйласам, шу йўлда қаттиқ тургим келади. Лекин бир натижа бўлиши қийин. Шу сабабли, Аллоҳ йўлида шуни ўз ҳисобимдан амалга оширсам, сув чиқариш, йўл ва кўприк қуриш каби кўпчиликка манфаати етувчи хайрли иш қилганлик савобидан умид қилсам бўладими?