Турли саволлар
Ассалому алайкум! Ҳурматли устозлар, Аллоҳ сизларга улкан ажр бeрсин.
Савол. 1). Агар таҳорат кўп сақланмаса, яъни қорин дамласа, ёки таҳоратсиз кeтаётган одам Аллоҳни зикр қилиб юришни хоҳласа, зикр қилиш мумкинми?
2.) Тасбeҳ намозида «Субҳаналлоҳи валҳамду лиллаҳи ва ла илаҳа иллаллоҳу валлоҳу акбар» ни ҳар ракъатда 75 марта ўқийди, 1-ракъат охирги 10 тасини қандай ҳолатда ўқийди. Саждадан туриб қаъдадами ёки қиёмдами? Туман масжид имомидан сўрасам «бўлиши мумкин эмас, намозда саноқ ишлатиш макруҳ, хушуъ йўқолади» дейишди. Шу тўғрими. Илтимос жавобсиз қолдирманглар, раҳмат.
Ва алайкум ассалом! 1). Мумкин. 2). Иккинчи саждадан кейин, тик туришдан аввал ўқилади. ТАСБЕҲ НАМОЗИ Икриманинг Абдуллоҳ ибн Аббос розияллоҳу анҳумодан ривоят қилишича, Расулуллоҳ соллаллоҳу алайҳи васаллам Аббосга қарата: «Эй амаки! Сизга бермайми? Сизга ўргатмайми?» деган сўзларни зикр қилиб, сўнг бундай дедилар: «Тўрт ракат намоз ўқийсиз. Ҳар ракатда Фотиҳани ва бошқа бир сурани ўқийсиз. Биринчи ракатда қироатдан сўнг қиёмда «Субҳаналлоҳи валҳамду лиллаҳи ва ла илаҳа иллаллоҳу валлоҳу акбар» тасбеҳларини ўн беш марта айтасиз. Сўнгра рукуъга борасиз ва рукуъда турганингизда мазкур тасбеҳларни ўн бор айтасиз. Кейин бошингизни рукуъдан кўтарган вақтда ҳам яна тасбеҳларни ўн марта айтасиз. Сўнг саждага бора-сиз. Саждада турганингизда яна мазкур тасбеҳларни ўн бор қайтарасиз. Сўнг бошингизни саждадан кўтариб, яна мазкур тасбеҳларни ўн бор айтасиз, сўнг яна сажда қиласиз ва унда яна ўн бор тасбеҳ айтасиз, сўнг бошингизни саждадан кўтариб, тик бўлишингиздан олдин яна ўн марта тасбеҳ айтасиз. Бу айтилган тасбеҳларнинг умумий адади етмиш бешта бўлади. Тўрт ракатни шу тахлитда адо этасиз. Агар бу намозни бир кунда бир марта адо этишга қодир бўлсангиз, уни адо этинг. Агар бир кунда адо этишга қодир бўлмасангиз, жума куни бир марта ўқинг. Агар жума кунида адо этишга қодир бўлмасангиз, уни бир ойда бир ўқинг. Агар бунга қодир бўлмасангиз, уни бир йилда бир бор адо этинг. Бунга ҳам имкон бўлмаса, умрингиз давомида бир бор «тасбеҳ» намози ўқиб қўйинг».(“Мўминнинг меърожи” китобидан). Валлоҳу аълам!
