Ҳалолик учун узук
Ассалому алайкум! Аёлимга дугонаси «Аёл киши халоллик учун узук тақиб юриш кeрак» дeбди. Хeч-хам бундай гап эшитмагандим, бу ҳақида интeрнeтдан анча малумот изладим ҳeч нима тополмадим, шунинг учун сизларга савол юбордим. Бу тўғрими? Билмадим аёллар бундай гапларни қаeрдан топишади.
Ва алайкум ассалом! Расулуллоҳ соллаллоҳу алайҳи васаллам аёллар билан эркакларнинг қўллари бир биридан фарқ қилиб туришига буюриб қуйидагича марҳамат қилганлар:
عَنْ عَائِشَةُ رَضِيَ اللهُ عَنْهَا قَالَتْ: أَوْمَتِ امْرَأَةٌ مِنْ وَرَاءِ سِتْرٍ بِيَدِهَا كِتَابٌ إِلَى النَّبِيِّ صَلَّى اللهُ عَلَيْهِ وَسَلَّمَ فَقَبَضَ يَدَهُ، فَقَالَ: مَا أَدْرِي أَيَدُ رَجُلٍ أَمْ يَدُ امْرَأَةٍ؟ قَالَتْ: بَلْ يَدُ امْرَأَةٍ، قَالَ: لَوْ كُنْتِ امْرَأَةً لَغَيَّرْتِ أَظْفَارَكِ بِالْحِنَّاءِ. رَوَاهُمَا أَبُو دَاوُدَ وَالنَّسَائِيُّ
Оиша розияллоҳу анҳодан ривоят қилинади: «Бир аёл парда ортидан қўли ила Расулуллоҳ соллаллоҳу алайҳи васалламга мактуб узатди. Бас, у зот қўлларини тортдилар ва: «Билмадим, бу эркакнинг қўлими, аёлнинг қўлими?» дедилар. «Аёлнинг қўли», деди у. «Аёл бўлсанг, тирноқларингга ҳинно қўйиб олсанг бўлмасмиди», дедилар у зот». Иккисини Абу Довуд ва Насаий ривоят қилганлар. Шарҳ: Яққол кўриниб турибдики, Исломда аёл кишиларнинг ўзларига қарашларига, гўзаллик ва латофатларини турли йўллар билан сақлаш, парвариш қилишларига катта эътибор берилган. Ҳаддан ошмай, меъёрида пардоз ишларининг ўрнига қўйилиши тарғиб қилинган. ("Ҳадис ва Ҳаёт" китобидан). Валлоҳу аълам!
