Оламдан ўтган отам учун нима қилсам яхши
Ассалому алайкум! Устозлар, отам ёшлигимизда оламдан ўтган, Аллоҳ раҳмат қилсин. Отам номоз ўқимаган, тўғриси эслай олмайман ҳам. Шу ўқимаган номоз учун фидя ёки эхсон ёки яна бирор нарса қилсам бўладими?
- Ва алайкум ассалом! Албатта бўлади. Қолдирган фарз намоз ва фарз рўзаларининг фидясини тўлашингиз мумкин.
Фидя ва каффоротнинг миқдори бир вақт намоз учун ярим соъ буғдой ёки унинг қиймати. Бир кунлик рўза учун ҳам шунча бўлади. Ярим соъ буғдойни баъзи бир китобларда “1087,5 гр” ёзилиб қолган экан. Бу уламоларнинг таҳқиқотига бироз хилоф. Шунинг учун 2 килограммни олган афзал. Яъни бир вақт намоз учун 2 килограмм буғдой. Шунда бир кундаги 6 вақт намозга ҳисобланса 12 килограмм буғдой дегани. Шунда 1 килограмм буғдой 2000 сўм бўлса, бир кунлиги 24.000 сўм бўларкан. Бир йиллик намозлариники 8.760.000 сўм, бир йиллик рамазон рўзасиники 120.000 бўлади. Буғдойни бозордаги нархи ўзгаришига қараб рақамларда ҳам ўзгариш бўлади. Валлоҳу аълам!
