Тиббиёт ва оила

Ассалому алайкум! Алҳамдулиллаҳ, тиббиёт олийгоҳида таҳсил оламан, иложи борича соҳамнинг етук мутахассиси бўлиб етишиш учун тиришиб ўқийман, чет тиллари ҳам ўрганаман, Қуръон ўқийман, намозларимни қазо қилмасликка ҳаракат қиламан. 19ёшдаман. Ҳали турмушга чиқмаганман, лекин ота-онам яқин йилларда турмушга беришмоқчи. Мени шу турмуш қургандан кейинги ҳаёт ўйлантиради. Фарзандларимни ҳақиқий исломий руҳда тарбияламоқчиман ин шаа Аллоҳ, Қуръон ёдлаттирмоқчиман, унинг учун мен асосий вақтимни улар билан ўтказишим керак. Лекин танлаган касбимчи... тиббиёт соҳасида ўқиш жуда ҳам қийин ва кўп йиллар, ўз устида кўп ишлаш талаб қилади. Агар бу даражада қийинлигини тасаввур қилганимда балки аввал бошқа соҳа танлаган бўлармидим... Чала савод шифокор бўлиб қолишдан жуда қўрқаман. Бир тарафдан оилам ва фарзандлар тарбияси, яна бир тарафда касбим... Муслима аёл сифатида қандай йўл тутганим маъқул?