Намозда бармоқни қулоққа тегизиш ҳақида
Бисмиллаҳир Роҳманир Роҳийм. Алҳамдулиллаҳ, вассалату вассаламу ъала росулиҳи Муҳаммад. Ассалому алайкум Шайх ҳазратлари. Дуо қиламиз Аллоҳ илмингизга ва умрингизга барокатлар берсин. Жавобингиз учун ташаккур. САВОЛ : "Бир аҳли илм биродаримиз бизга – "бармоқни қулоққа текказиш бидъат, Пайғамбаримиз с.а.в. қўлларини қулоқлари баробар кўтардилар деган маънодаги ҳадис бор " – дедилар. Шу мавзуга жавоб беришингизни сўраймиз.
– Ва алайкум ассалом! Ўша биродарингизнинг айтгани тўғри, қилгани нотўғри. Ривоятларда икки қўл панжалари қулоқнинг юмшоқ жойига баробар кўтарилиши бор. Аммо мужтаҳид уламолар "билмаган одамлар мазкур кўтаришни турли қилиб юбормасинлар", дея бармоқни қулоқнинг мазкур жойига текказишни тавсия қилганлар. Сиз мазкур биродарингизни бундан кейин илмли деманг. Имли киши бу каби гапларни айтмайди. Бунга ўхшаш нарсаларга вақт, куч, имконият ва ақлни сарфлаш ўрнига, икковингиз бир бўлиб, умуман намоз ўқимай юрганларга намоз ўқишни ўргатинглар. Ана шу фойдали бўлади.
