Рўйхатдан ўтган парол ёки логинингизни ёзинг
Ижтимоий тармоқлар орқали киринг:
Ёки рўйхатдан ўтинг:
Исмингиз
Э.Почтангиз
Паролингиз
Паролни такрорланг
Рўйхатдан ўтиш тугмасини босишингиз билан сайтдан фойдаланиш қоидалари билан ҳам танишиб чиққан бўласиз

Обрў тўкиш эмасми

16:33 / 03.01.2023 | Abdulloh | 2067

Ассалому алайкум! Мен талабаман. Бизга берилган мавзу юзасидан слайд тузиб гапириб бериш вазифа қилинган. Кўпчилик талабалар ўзларининг мавзусини ўзлари ҳам тушунишмайди. Кўпчилиги интернетдан слайд олади ёки узуқ-юлуқ маълумотларни йиғиб слайд тузишади. Мақсадлари мустақил ишни бажарди деган мақомга эришиш. Уларнинг слайдлари ичида имло хатолари кўп, бундан ташқари ҳеч қандай маъносиз тузи йўқ гаплар ҳам бор. Афсуски талабалар ичида ҳамманинг олдига чиқиб туриб шунақа тузи йўқ, маъноси йўқ гапларни ўқиб турадиганлар ҳам бор. Баъзиларининг тузган слайдларини ҳожатхонадаги ахлатдан ҳам баттар деб биламан. Чунки уни ичидаги маълумотлар ростми ёлғонми ўзи ҳам билмайди, маъносиз гаплар кўп, кўзбўямачилик қилиб ўқиб беришади. Хуллас кўзбўямачилик авж олиб кетган. Мен шунақа бемаза слайдни гапириб турган талабага бу ерда мана бу сўзни хато ёзибсиз ёки тузи йўқ гапни ўқиб турганида бу гапни маъноси нима ўзи деб савол берсам уни обрўсини тўккан бўлиб қолмайманми, чунки слайдни хатолари кўп ҳаммасини айтаверсам у талаба уялиб қолиши мумкин. Шунақа кўзбўямачилик бўлиб турган пайтда индамай ўтирсак гуноҳкор бўлиб қолмаймизми?


«Зикр аҳлидан сўранг» ҳайъати:

– Ва алайкум ассалом! Барчанинг олдида хатосини юзига солиб шарманда қилиш тўғри иш эмас. Бировнинг ҳақига тажовуз бўлаётган бўлсагина дарҳол айтсангиз бўлади. Агар ундай бўлмаса холи қолганда якка ўзига айтинг. Бундай кўзбўямачиликлар авж олгани барчамизнинг мусибатимиз. Сиз шу нарсани ўзингиз ўқиб турган ўша жойдан йўқота олсангиз, уммат ривожи учун ҳисса қўшган бўлар эдингиз. Аммо насиҳатингиз гўзал услубда бўлсин. Инсонларнинг шахсиятини эмас, хато феълларини танқид қилинг. Даъватингиз инсонлар орасини бузишга олиб бормасин. Чуқур мулоҳаза билан иш тутинг. 

عن أبي هريرة رَضِي اللهُ عَنْهُ قَالَ رَسُولُ اللهِ صَلَّى اللهُ عَلَيْهِ وَسَلَّمَ الرِّبَا سَبْعُونَ حَوْبًا، أَيْسَرُهَا نِكَاحُ الرَّجُلِ أُمَّهُ، وَأَرْبَى الرِّبَا : اسْتِطَالَةُ الرَّجُلِ فِي عِرْضِ أَخِيهِ. ورواه الإمام أحمد في المسند

Абу Ҳурайра розияллоҳу анҳудан ривоят қилинади:
Расулуллоҳ соллаллоҳу алайҳи васаллам “Рибо етмиш жуздир, уни(гуноҳи)нг энг енгили киши онаси билан яқинлик қилиш билан баробардир. Рибонинг энг каттаси киши ўз биродарининг обрўсини тўкишдир”.
Имом Аҳмад “Муснад”ларида ривоят қилганлар.
Бировларни обрўсини тўкадиганларга Аллоҳ таоло "Ҳумаза" сурасида марҳамат қилади:

 وَيْلٌ لِّكُلِّ هُمَزَةٍ لُّمَزَةٍ۝

1. Ҳар бир обрў тўкувчи ва айбловчига вайл бўлсин.
Одамларнинг обрўсини ғийбат йўллари билан кўп тўкувчи одам араб тилида «ҳумаза» дейилади. Одамларнинг айбини, камчиликларини имо-ишора ила масхара қилувчи «лумаза» дейилади. «Вайл» жаҳаннамдаги бир водийнинг номи ёки «ҳолига вой», «ҳалок бўлсин» деган маънодаги сўз эканини олдин ҳам ўрганганмиз.
Ушбу икки сифатга эга бўлганларнинг барчаси дўзахга тушади ва уларнинг аҳволига вой бўлади, дейди Аллоҳ таоло. Чунки мўмин кишининг қонини тўкиш қанчалик гуноҳ бўлса, обрўсини тўкиш ҳам шунчалик гуноҳ. Одам ўлдириб – қон тўкиб гуноҳ қилганлар жаҳаннамга тушганларидек, ғийбат қилиб – обрў тўкиб, кишиларни хафа қилганлар ҳам жаҳаннамга тушади. ("Тафсири Ҳалол" китобидан).
Расулуллоҳ соллаллоҳу алайҳи васаллам ҳадисларида:
«Икки сўкишган, обрўсини тўкаётган ва ёлғон гапираётган кишилар икки шайтондир», дедилар».
«Мусулмоннинг бору буди мусулмонга ҳаромдир: қони ҳам, моли ҳам ва обрўси ҳам».
Ҳа, мусулмоннинг қонини тўкиш гуноҳи азимдир. Ҳа, мусулмоннинг молини олиш ҳам гуноҳи азимдир. Ҳа, мусулмоннинг обрўсини тўкиш ҳам худди унинг қонини тўкиш, молини олиш каби гуноҳи азимдир. Шунинг учун бировни ўлдиришдан ёки молини ўғрилаб олишдан қанчалар ўзимизни эҳтиёт қиладиган бўлсак, унинг обрўсини тўкишдан ҳам шунчалик эҳтиёт бўлайлик.

عَنْ مُعَاذِ بْنِ أَنَسٍ الْجُهَنِيِّ رَضِي اللهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: مَنْ حَمَى مُؤْمِنًا مِنْ مُنَافِقٍ بَعَثَ اللهُ مَلَكًا يَحْمِي لَحْمَهُ يَوْمَ الْقِيَامَةِ مِنْ نَارِ جَهَنَّمَ، وَمَنْ رَمَى مُسْلِمًا بِشَيْءٍ يُرِيدُ شَيْنَهُ بِهِ حَبَسَهُ اللهُ عَلَى جِسْرِ جَهَنَّمَ حَتَّى يَخْرُجَ مِمَّا قَالَ

Муъоз ибн Анас ал-Жуҳаний розияллоҳу анҳудан ривоят қилинади:
«Набий соллаллоҳу алайҳи васаллам:
«Ким бир мўминни мунофиқдан ҳимоя қилса, Аллоҳ қиёмат куни бир фариштани юбориб, унинг гўштини жаҳаннам ўтидан ҳимоя қилади.
Ким бир мусулмонни шарманда қилиш учун уни бир нарса ила айбласа, Аллоҳ уни жаҳаннам кўприги устида то у айтган гапидан қайтмагунича ушлаб туради», дедилар».
Шарҳ: 
Бир одам мўмин кишини ғийбат қилиб, обрўсини тўкаётган бўлса, уни эшитиб турган кишилар ичидан мазкур мўминни ҳимоя қилган одам катта ажрга эга бўлади. Унинг мўмин кишининг обрўсини ҳимоя қилгани қиёматда ўзига катта бахт бўлиб қайтади. Аллоҳ таоло уни дўзахдан ҳимоя қилади. Бас, шундай экан, мўминлар бир-бирларини мунофиқларнинг ғийбат ва бўҳтонларидан ҳимоя қилишлари зарур.
Аксинча, бу дунёда мўмин-мусулмонни айблаш билан машғул бўлган одам қиёматда хижолатда қолар экан. Маҳшарга тўпланганлар ҳузурида қилган нобакорлиги жазоси сифатида, жаҳаннам кўпригидан ўта олмай, тўхтаб қолар экан. Бас, шундай экан, мўмин банда зинҳор ўз биродарини айблашга ўтмасин. ("Ҳадис ва Ҳаёт" китобидан). Валлоҳу аълам!

Топ рейтинг www.uz Openstat