Талоқ ҳақида

Ассаламу алайкум! Ҳурматли ҳайъат! Касбим доирасига ажрашган ёки буткул ажрашиш остонасида турган ёш ва ўрта ёшдаги оилаларни яраштириш ҳам киради. Айрим ҳолларда ўзаро жанжаллашган оилаларни яраштирмоқчи бўлсам, эрлар "Хотинимнинг жавобини берганман, уч талоқ қўйганман" дейишади, энг ачинарлиси, эр ота-онасининг талаби билан ҳам хотинига талоқ берган ҳолатларини ҳам кузатаман. Ваҳоланки арзимаган баҳона ёки сабаб улар оиласининг бузилишига сабаб бўлган. Шундай шароитда қандай иш тутишни ҳам билмай қоламан. Агар аёлга “жавобингизни берган экан, сизларни яраштира олмайман” десам қонунларимизга тўғри келмайди. Нима қилай? Уларнинг айримларига масжидга боришни, домлалардан маслаҳат олишларини таклиф қилиш билан бирга, ярашишга ундайман. Тўғримикан?