Саримсоқ пиёз истеъмол қилиб масжидга бориш
Ассалому алайкум! Ҳурматли устозлар, жумъа намозида ёнимда ўтирган намозхон саримсоқ пиёз истеъмол қилиб масжидга кирган экан, хижолат қилмасин деб танбеҳ бера олмадим, лекин имом қилаётган мавъиза ҳам қулоғимга кирмай қолди, намозга такбир айтилгандан кейин ёнга сурилиб орқа сафдаги намозхонни ёнимга чақириб олдим. Намоздан кейин ўзимга раво кўрмаган нарсани орқа сафдан ёнимга ўтиб намозни адо қилган кишига раво кўрганим учун юрагим ғаш бўлиб қолди. Бундай холатда қандай йўл тутиш керак? Ноқулай савол учун олдиндан узр сўрайман.
Ва алайкум ассалом! Бундай суратда “бу биродаримиз шу масалани билмаса керак” деб сабр қилиш керак. Бунчалик нозик бўлмаслик керак. Динимизда “таҳаммулул азаа” озорларни кўтариш хислати ҳам мақталган. Ҳусусан жоҳил бўлса. Бундай ўринларда кечиримли ва сабрли бўлиш Расулуллоҳ соллаллоҳу алайҳи васалламнинг суннатларидандир. Валлоҳу аълам!
