Исроф хақида
Ассалому алайкум! Бир қўшним бор, доим исроф ҳақида гапиради. Аммо ўзининг уйига чиқсангиз ошхонасидаги бузилган кранидан қишин-ёзин сув оқади. Бундан ташқари,ошхонасидаги газ плитаси керак бўлмаган пайтда ҳам ёниб туради. Унга бу борасида "Ахир бу исрофгарчиликка киради-ку!" десам, "пулини тўлаб қўйганман, бу исрофгарчиликка кирмайди" - дейди. Бу масала бўйича қўшним ҳақми?
– Ва алайкум ассалом! Ноҳақ. Чунки мол дунё Аллоҳни бандасига берган омонати ҳисобланади. Пулини тўлаган бўлса ҳам ўзи ишлаб топган бўлса ҳам жойига ишлатмаслик исроф бўлади.
عَنْ عَبْدِ اللهِ بْنِ عَمْرٍو: رَضِي اللهُ عَنْهُ أَنَّ رَسُولَ اللهِ صَلَّى اللهُ عَلَيْهِ وَسَلَّمَ مَرَّ بِسَعْدٍ وَهُوَ يَتَوَضَّأُ فَقَالَ: «مَا هَذَا السَّرَفُ؟» قَالَ: أَفِي الْوُضُوءِ إِسْرَافٌ؟ قَالَ: «نَعَمْ، وَإِنْ كُنْتَ عَلَى نَهْرٍ جَارٍ». رَوَاهُ أَحْمَدُ وَابْنُ مَاجَهْ
Абдуллоҳ ибн Амр розияллоҳу анҳудан ривоят қилинади:
«Расулуллоҳ соллаллоҳу алайҳи васаллам Саъднинг олдидан ўтдилар. У таҳорат қилаётган эди. Бас, у зот:
«Бу қандай исроф?!» дедилар.
«Таҳоратда ҳам исроф бўладими?» деди.
«Ҳа! Агар оқиб турган дарё устида бўлсанг ҳам!» дедилар».
Аҳмад ва Ибн Можа ривоят қилишган. ("Кифоя" китобидан). Валлоҳу аълам!
