Намоздаги хато

Ассалому алайкум! Мен шу пайтгача намозда сураларни эшитганимдек ўзимча қироат қилиб келганман. Сураларни ўқилишини ўрганишга вақтим бўлса-да, аммо дангасалик қилганман. Алҳамдулиллаҳ энди интернетдан тўғри қироат қилишни ўрганяпман. Бугун Фотиҳа сурасининг "Иййъака наъбуду ва иййъака настаъъийн" қисмидаги "Иййъака" сўзини нотўғри талаффуз қилиш, ""Ийъака" деб талаффуз қилиш маънони бутунлай ўзгаришига, ширкка олиб келиши мумкинлигини билиб олдим. Мен намозда шу сўзни иккита "й" билан эмас, битта "й" билан қироат қилган эканман. Қироатда "Иййъака" деб талаффуз қилинишини эшитгандим, лекин эътибор бермай келган эканман. Аллоҳ гуноҳларимни кечирсин. Ҳозир ўқиган намозларим бузилдими, ширк қилиб қўйдимми деб қўрқяпман. Энди намозларимни қайта ўқишим керакми? Катта гуноҳ қилиб қўйдимми?