Автосалондан машина олиш тугрисида!

Ассалому алайкум, Ҳазрат!Қуйидаги ҳолат юзасидан маслаҳатингизга муҳтожман. Ўйлайманки, юртдошларимизнинг кўплари бундай ҳолатга дуч келиши мумкин. Маълумки, бугунги кунларда автосалонлардан юртимизда ишлаб чиқарилган нексия ёки матиз машиналарини сотиб олишга талабгорлар жуда кўп. Шу сабабли, автосалонга машина олиш учун навбатга ёзилиш керак. Навбатингиз келгунча камида бир неча ой, балки бир неча йил ҳам кутишга тўғри келиши мумкин. Шундай ҳолатда, кимдир Сизга маълум бир ҳақ эвазига автосалондан қисқароқ муддатда (айтайлик 1-2 ой ичида) машина сотиб олишинигизга ёрдам бериши мумкин бўлса, шу кимсанинг хизматидан фойдаланиш шариатимиз ҳукмига кўра тўғри бўладими? Ожиз билимим "бу каби хизматдан фойдаланиш шариатга тўғри келмайди" демоқда. Бундай хизматни "ўртакашлик ёки даллоллик ҳақи" деб баҳолаш керакми, ёки "пора" дебми? Илтимос, шу масалага ойдинлик киритиб берсангиз.Қимматли вақтингизни аямасдан ушбу саволга жавоб берганингиз учун аввалдан миннатдорчилик билдириб қоламан. Аллоҳ Сиздан рози бўлсин!