Алас суҳ қилиш
Ассалому алайкум! Биз чека қишлоқда яшаймиз бизда билимсизлик ва дини яхши билмаслик ҳар-ҳил инсонларга ишонишга олиб келмоқда. Бизнинг қишлоқда алас - суҳ қиладиган аёллар кўпайиб кетмоқда одамлар фарзанди бўлмаса ёки болалари инжиқлик қилса ёки касал бўлиб ва яна кўплаб шунга ўхшаш муоммолар сабабдан боришади.1 ( Алас ) улар эса борган одамга иккита ярим метр қамиш учига ёғ суртилган безни ёқиб бошининг устидан бисмиллоҳ айтиб уч маротаба айлантиришади ва бошини бисмиллоҳ деб қисиб қўяди. 2(суҳ қуйиш) учун азгина лой олиб унга 10 см қамишчаларни олиб учига ёғ суртилган пахта қўйиб лойга сўқиб ёқиб устидан кўзани ёпиб уни одам бошидан айлантиради ва момоларим ўзингиз қўланг дейди ва яна бошини уқалаб дуо қилиб тузалиб кет дейди шу тўғрими мен одамларга бундай иш динимизда ё‘қ десам бор ахир хўжа ва муллалар шунга буюришади дейди шу тўгрими динимизда шундай ақийда борми илтимос жавобни кутаман .
– Ва алайкум ассалом! Бу ишларнинг на динга на тиббиётга алоқаси бор. Бордию “момоларим ўзингиз қўлланг” деса иймонга путур етадиган иш қилган бўлади. Бемор бўлса шифокорга учрасин. Фарзанд кўра олмаётган бўлса тиббий жиҳатдан барча сабабларини ҳозирлаб қўйиб Аллоҳдан дуо ила илтижо қилиб сўрасин. Аллоҳ таоло "Шууро" сурасида марҳамат қилади:
لِلَّهِ مُلْكُ السَّمَاوَاتِ وَالْأَرْضِ يَخْلُقُ مَا يَشَاء يَهَبُ لِمَنْ يَشَاء إِنَاثًا وَيَهَبُ لِمَن يَشَاء الذُّكُورَ أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَن يَشَاء عَقِيمًا إِنَّهُ عَلِيمٌ قَدِيرٌ
49. Осмонлару ернинг подшоҳлиги Аллоҳникидир. У Зот хоҳлаган нарсасини яратур. У Зот хоҳлаган кишисига қизлар ҳадя этур ва хоҳлаган кишисига ўғиллар ҳадя этур.
50. Ёки уларни жуфтлаб – ўғил-қиз қилиб берур ва хоҳлаган кишисини туғмас қилур. Албатта, У ўта билувчидир, ўта қудратлидир.
Инсонга ҳамма нарсани фақат Аллоҳ таоло беришининг ёрқин намунаси фарзанд масаласида кўринади. Айни шу масалада инсон ўзининг ожизлигини хис этади. Ўз хоҳишига кўра бирон нарсани бор қила олмаслигини, балки доимо Аллоҳ таолонинг мадади ва иноятига муҳтож бўлиб туришини англаб етади.
«Осмонлару ернинг подшоҳлиги Аллоҳникидир».
Осмонларда ва ерда нимаики бўлса, ҳамма-ҳаммаси Аллоҳ таолонинг мулкидир.
«У Зот хоҳлаган нарсасини яратур».
Бу ишда У Зотнинг хоҳишига ҳеч ким тўсиқ бўла олмайди. Бутун борлиқнинг Молики – эгаси ва мутлақ Холиқи бўлган ўша Зот Ўз мулкидан хоҳлаган бандасига хоҳлаган нарсасини беради. Жумладан, фарзанд бериш масаласида ҳам
«У Зот хоҳлаган кишисига қизлар ҳадя этур».
Агар ўғил ё қиз фарзанд кўриш ота-она хоҳишига кўра бўлганида, ушбу оятлар нозил бўлаётган пайтдаги жоҳилий арабларда қиз фарзанд бўлмас эди. Чунки улар қиз фарзандни ёқтиришмасди. Ҳатто қизларини тириклай кўмиб ҳам ташлашарди. Ҳолбуки, баъзилар фақат қиз фарзандлар кўришади, ўғил фарзандга зор бўлиб юришади. Бу ҳол фарзанд фақат Аллоҳнинг хоҳиши билан ўғил ёки қиз бўлишини билдиради.
«...ва хоҳлаган кишисига ўғиллар ҳадя этур».
Фақат ўғил фарзандлар кўриб, Аллоҳдан қиз сўраб юрган одамлар ҳам оз эмас.
«Ёки уларни жуфтлаб – ўғил-қиз қилиб берур…»
Аралаш фарзандлар кўриш одамлар ичида кўп тарқалган ҳолатдир.
«...ва хоҳлаган кишисини туғмас қилур».
Бундайлар озчилик бўлиб, Аллоҳ таоло ибрат учун, фарзанд одамларнинг хоҳиши билан эмас, Аллоҳнинг хоҳиши билан бўлишини кўрсатиш учун шундай қилиб қўйган.
«Албатта, У ўта билувчидир, ўта қудратлидир».
Албатта, Аллоҳ ўта билувчи ва ўта қодир Зотдир.
Ҳамма нарсани билиб қилади. Жумладан, кимга қиз, кимга ўғил, кимга ўғил-қиз беришни ёки кимни туғмас қилишни ҳам Ўзи билади. Бу ишларга Унинг қудрати етади. ("Тафсири Ҳилол" китобидан). Валлоҳу аълам!
