намозга оид баъзи саволлар

00:00 / 22.01.2009 | eski savollar | 2330

Ассаламу алайкум, хурматли устоз сизга намоз ҳақида баъзи бир саволларим бор эди:- қадаи охирда дуо қилинганда мазҳаббошимиз қурон ва суннатга оид дуоларни қилиш жоиз деган эканлар, шунга мувофиқ, қадаи охирда битта эмас балки бир нечта дуони кетма-кет ўқиса бўладими?- бизнинг маҳалладаги масжитта ҳуфтондан сўнг витр намозига баъзи бир биродарлар имомдан олдин туришади, бу ҳолат одатда ҳунук кўринади, ҳудди имомларга нисбатан хурматсизликга ўхшайди, бу масалага шарият нима дейди?- сизнинг ва бошқа ҳанафий олимларининг китобларини ўқиб, намозда муқтадий имомга иқтидо қилганида нималар дейдию, нималар демайди, шу ҳақида ҳам аниқ тушунча олишга қийналаяпман. Ҳадис ва Ҳаёт силсиласининг 5-китобида муқтадий имомга иқтидо қилганда фақатгина "сано" ўқийди дейилган, давомида эса имом "самиаллоҳу лиман ҳамидаҳ" деганидан сўнг муқтадий "роббана лакал ҳамд" дейди дейилган. шу жойига ҳам тушунтириш берсангиз илтимос.- Истиҳора намозини қандай ўқийди ва унинг натижасини қандай билиш мумкин? бу ҳақида ҳам турли маълумотларга дуч келаяпман.Ассаламу алайкум ва раҳматуллоҳи ва баракатуҳу!

Шайх Муҳаммад Содиқ Муҳаммад Юсуф роҳимаҳуллоҳ:

- «Истихора» сўзи луғатда хайрни талаб қилиш, деган маънони англатади. Мусулмон киши икки ишдан қайси бирини қилишини билмай қолганда, хайрлисини танлаш учун истихора намози ўқийди. Бу намозни ҳар бир мубоҳ ишдан олдин ўқиш мустаҳабдир.Жобир розияллоҳу анҳудан ривоят қилинади: «Пайғамбар соллаллоҳу алайҳи васаллам бизга ҳамма ишларда истихора қилишни худди Қуръондан сурани таълим бергандек таълим берар эдилар. У зот:«Қачон бирингиз бир иш қилмоқчи бўлса, фарз намоздан бошқа икки ракат намоз ўқисин. Сўнг: :Эй бор Худоё! Албатта, мен Сендан илминг ила истихора қиламан. Сенинг қудратинг ила қудрат сўрайман. Сендан улуғ фазлингдан сўрайман. Албатта, Сен қодир бўлурсан, мен қодир бўлмасман. Сен билурсан, мен билмасман. Сен ғайбларни ўта яхши билувчи зотсан. Эй бор Худоё! Агар ушбу иш менга динимда, маошимда ва ишим оқибатида яхши эканлигини билсанг (ёки ҳозирги ишимдаю, келгусида) уни менга тақдир қилгин, менга осон қилгин, сўнгра уни мен учун баракали қилгин. Агар ушбу иш мен учун динимда, маошимда ва ишим оқибатида (ёки ҳозирги ишимдаю келгусида) ёмон эканлигини билсанг уни мендан буриб юбор, мени ундан буриб юбор. Ва менга қаерда бўлса ҳам яхшиликни тақдир қил. Сўнгра мени унга рози қил десин ва ҳожатини айтсин», дедилар».Бешовларидан фақат Муслим ривоят қилмаган.Ушбу намозни ўқигандан кейин мазкур иш ҳақида ўйламай, Аллоҳ ихтиёр қиладиган нарсани кутиб юради. Кейин кўнглига тушиб, ўзига маъқул бўлиб қилгиси келиб қолса-қилади. Бу ҳақда туш кўриши ҳам мумкин. Агар иш бир тарафга бўлмай туриб қолса истихора намозини яна қайтадан ўқийди. Қайта ўқиш етти мартагача бўлади. Истихора намозининг биринчи ракатида «Фотиҳа» сурасидан кейин «Кофирун» сурасини, иккинчи ракатда «Ихлос» сурасини ўқийди. Валлоҳу аълам.