Аёллар кийими ҳақида

Ва алайкум ассалом! Инсон Аллоҳ таолони танишига қараб ҳукмларини амалга ошириш содир бўлади. Ким қанчалик Аллоҳ таолони кўп таниса, Аллоҳдан бўладиган қўрқинчи ҳам шунча зиёда бўлади. Аллоҳ таоло “Фатир” сураси  28-оятида марҳамат қилади : 

إِنَّمَا يَخْشَى اللَّهَ مِنْ عِبَادِهِ الْعُلَمَاء إِنَّ اللَّهَ عَزِيزٌ غَفُورٌ۝ 

«Аллоҳдан бандалари ичидан фақат олимларигина қўрқарлар». Аллоҳ таолонинг қудратини ҳис этиб, яратилган нарсалардан ибрат олиб, уларнинг яратувчиси борлигини англаб етиб, ақли билан Аллоҳни топган ва Ундан қўрққан одамгина олим ҳисобланади. Аммо мазкур махлуқотларнинг тарихи, тузилиши, таркибидаги моддалари, хусусиятлари ва бошқа турли маълумотларини тўлиқ ўрганиб, уларни яратган Аллоҳни танимаган ва ундан қўрқмаган одам ўта жоҳил ҳисобланади. Абдуллоҳ ибн Аббос розияллоҳу анҳу: «Илм гапнинг кўплигида эмас. Илм қўрқишнинг кўплигидир», – деган эканлар. Имом Ҳасан Басрий:«Олим Аллоҳдан ғойибона қўрққан одамдир. Аллоҳ қизиқтирган нарсага қизиққан, Аллоҳ ёмон кўрган нарсадан қочган одамдир», – деб туриб, «Аллоҳдан бандалари ичидан фақат олимларигина қўрқарлар» оятини тиловат қилар эканлар. «Албатта, Аллоҳ ўта иззатлидир, ўта мағфиратлидир». Аллоҳ ҳар нарсадан ғолибдир. Нимани хоҳласа, қила олур. У ўта мағфиратли Зотдир. Вақтида ибрат олиб, ўзини таниганларни мағфират этади. (“Тафсири Ҳилол” китобидан). Аёлингизни мажбурлаш ўрнига илм ўқитишга ҳаракат қилинг. Валлоҳу аълам!