Ҳаж Маҳр ўрнига ўтадими?
Аллоҳ Исломни ривожи учун қилаятган ишларингизни ривожини берсин, Илмингизни зиёда қилсин. Бундай саволга бошқа интернетдаги саҳиҳ сайтлардан топа олмадим, Шу масалага бироз ойдинлик киритсангиз деган ният билан бироз ҳижолат бўлиб ушбу саволни бераяпман. Яқинда Иншоллоҳ турмуш қураятган эдим, Мен уйламоқчи бўлган қиздан маҳрни сўраганимда Иложи бўлса Турмуш қурганимизнинг илк йилида (имконият бўлмаса кейинги йилида) Ҳажга бориш деб сўрадилар. Мен қўйинг уни ўрнига бирор моддий нарсалар ҳам сўрашингиз мумкин, шундоғ ҳам турмушнинг илк йилларида Ҳажга жуфти ҳалолим билан бормоқчи эдим, кейинчалик Маҳр ўрнига бошқа нарсани сўрамаганингизга афсусланманг, дедим. У киши йўқ афсусланмайман дедилар. Шунга иккаламиз ҳам кўнгандик. Лекин бироз ўтиб Маҳрга Ҳажни сўраш умуман жоизми йўқми деган савол иккаламизни ҳам бироз уйлантириб қўйди. Шу масалани Исломга кўра ҳукми қандай? Маҳр ўрнига Ҳажга аёлини этишнинг ҳукми қандай? Аллоҳ илмингизни зиёда қилсин, барчамизни илм олувчи ёки илм берувчилардан қилсин, учинчи тоифадан бўлиб қолишдан ўзи сақласин.
МАҲРНИНГ ШАРТЛАРИ
1. Қийматга эга, мол деса бўлгудек нарса бўлиши керак. Кўпчилик уламолар Ҳанафий мазҳабининг маҳрнинг энг ози ўн дирҳам бўлиши керак, деган ижтиҳодини маъқул топганлар. Жобир розияллоҳу анҳу қилган ривоятда «Агар эркак киши аёлга маҳрни ҳовучини тўлдириб таом бериш ила адо этса, аёл унга ҳалол бўлур» - дейилган. Бунда маҳр уйланишдаги асосий қасд эмас, балки эрнинг хотиннинг нафақасини доимий равишда қилиб туришини ўз бўйнига олганига ишора эканини кўрсатади.
2. Маҳрга бериладиган мол ҳалол ва пок бўлиши керак. Чўчқа, ароқ, ўлимтик каби шариат ҳаром қилган нарсалар маҳр ўрнига ўтмайди.
3. Маҳрга бериладиган мол бировдан тортиб олинган бўлмаслиги шарт.
4. Маҳрга аталган мол ноаниқ бўлмаслиги шарт.
Маҳр фақат пул бўлиши шарт эмас. Молявий қийматга эга нарса бўлса бўлаверади. Ҳовли-жой, ер, ҳайвон, тижорат молига ўхшаш нарсалар шулар жумласига киради.
Мазкурлардан ҳажга олиб бориш ҳам маҳр бўлмаслиги чиқади. Шунинг учун шартларни ўзида мужассам қилган маҳрни келинга бериб, ҳажга олиб боришни мурувват юзасидан ваъда қилсангиз яхши бўлади.
