Намозда одамлардан сўрайдиган нарсаларни тилаб дуо қилиш жоиз эмас

Бисмиллаҳир Роҳманир Роҳийм.

- Ва алайкум ассалом! Намознинг ичидаги дуода одамлардан сўрайдиган нарсаларни тилаб дуо қилиш жоиз эмас. Чунки Расулуллоҳ соллаллоҳу алайҳи васаллам Муслим, Абу Довуд ва Аҳмад келтирган ривоятда:

«إِنَّ هَذِهِ الصَّلَاةَ لَا يَصْلُحُ فِيهَا شَيْءٌ مِنْ كَلَامِ النَّاسِ، إِنَّمَا هُوَ التَّسْبِيحُ وَالتَّكْبِيرُ وَقِرَاءَةُ الْقُرْآنِ»، أَوْ كَمَا قَالَ صَلَّى اللهُ عَلَيْهِ وَسَلَّمَ. رَوَاهُ مُسْلِمٌ وَأَبُو دَاوُدَ وَأَحْمَدُ.
 

«Бу намозда одамларнинг каломидан ҳеч нарса мумкин эмас. У фақат тасбеҳ, такбир ва Қуръон қироатидан иборатдир», деганлар».

Бизда Муҳаммад алайҳиссаломга салавотдан кейин «Аллоҳуммағфирлий», деб бошланадиган машҳур дуони ўқиш одатга айланган.

«Аллоҳим! Менга фалон нарсани ризқ қилиб бергин», «Фистончини хотин қилиб бергин» каби дуолар ҳаромдир.

Аммо намоздан сўнг, яъни саломдан кейинги дуода истаган тилда хоҳлаган нарсасини сўраш мумкин. Фақат ўша сўраётган нарсаси шаръан жоиз нарсалар бўлиши шарт.

عَنِ ابْنِ عُمَرَ رَضِيَ اللهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: «لَا يَبِعِ الرَّجُلُ عَلَى بَيْعِ أَخِيهِ، وَلَا يَخْطُبْ عَلَى خِطْبَةِ أَخِيهِ إِلَّا أَنْ يَأْذَنَ لَهُ». رَوَاهُ الْخَمْسَةُ.

Ибн Умар розияллоҳу анҳумодан ривоят қилинади:

«Набий соллаллоҳу алайҳи васаллам: «Бирортангиз биродарининг совчилиги устига совчилик қилмасин ва биродарининг савдоси устига савдо қилмасин. Аммо бунга ўзи изн берса, мустасно», дедилар». Бешовлари ривоят қилишган.

Биров совчи қўйиб турган жойга унинг устидан совчи қўйиш ҳаром бўлганидан кейин, бошқа одамга турмушга чиқиши аниқ бўлиб, фотиҳа қилиб қўйилган қизнинг ўзиники бўлишини сўраб, шунга ҳаракат қилиш ҳам жоиз эмас. Фақат биринчи совчи қўйган одам келиша олмай, совчиликни тарк қилганидан сўнг ёки унинг ўзидан изн олгандан кейингина совчи қўйиш мумкин.

Чунки бировнинг совчилиги устига совчилик қилиш биринчи совчининг ҳаққига тажовуз қилишдир. Бу иш туфайли кишилар ўртасида низо, хусумат, адоват ва уруш-жанжаллар чиқади. Сиз ўша қизни Аллоҳ учун суйган бўлсангиз, Аллоҳнинг розилиги учун ўша қизга бахт тиланг. Айни пайтда ўзингизга ҳам ўшандай солиҳа жуфти ҳалол насиб этишини Аллоҳдан сўранг.

Аммо «Менинг бахтим фақат ўша қизга боғлиқ» деган фикрни хаёлингиздан чиқариб ташланг. Сизнинг бахтингиз аввало иймонли эканингиз ва шу йўлдаги кишилар қалбингизга яқин эканидадир. Ана шу нарсани ҳеч қачон эсингиздан чиқармай, ибодатда бардавом бўлсангиз, бу дунё ҳаёти келажакдаги абадий бахтли ҳаётга эришиш йўлидаги бир синов эканини унутмай, шунга лойиқ ҳаракат қилсангиз, ажаб эмас, Аллоҳ таоло ҳар икки дунёда сиз кутгандан кўра ҳам кўп шодликларни ато этса.

Валлоҳу аълам.

Дин ишлари бўйича қўмитанинг хулосаси рақами: 2022 йил 03-07/1077