Телпак сутра вазифасини бажара оладими?
Ҳурматли Шайх ҳазратлари, агар аввалги саволларимда тарбиясизликлар бўлган бўлса, минг бор узр. Инсон хато ва камчиликлардан холи эмас экан.
Сизнинг бу қилаётган ишларингиздан қанчадан-қанча кишилар манфаатланмоқда. Раҳмат. Аллоҳ таолонинг Ўзи сизга охиратда қийрот-қийрот ажрларни берсин.
Хафа бўлмасангиз, яна бир масала бор эди.
Қишда кийиладиган телпак сутра вазифасини бажара оладими?
Аллоҳ Ўзи рози бўлсин.
«Сутра» деганда намозхоннинг олдидан бирор нарса ўтмаслиги учун қўйилган тўсиқ тушунилади.
«Сутра»ни ҳанафий ва моликий мазҳаблари мандуб, шофеъий ва ҳанбалий мазҳаблари мустаҳаб, деганлар.
Девор, устун ҳам сутра бўлиши мумкин. Найза, асо ва шунга ўхшаш бошқа сутра бўладиган нарсанинг йўғонлиги бир бармоқчалик бўлиб, бўйи эса бир зироъга (46,2 см) тенг бўлиши керак. Ҳеч нарса топилмаса, бир чизиқ чизиб қўйса ҳам бўлади. Мақсад – намозхоннинг олдидан бирор нарса ўтиб, кўнглини бузмасин, хусусан, шайтон васваса қилмасин.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
