Рамазон ойидан кейинги тутиладиган рўза
Ассалому алайкум! Катталаримиздан Рамазон ойидан кейинги, яъни Ийд Ал Фитрнинг иккинси кунидан бошлаб 6 кун тутилган рўзага, бир йиллик тутилган рўзанинг савоби берилишини эшитиб қолдим. Аммо бу ҳақида қаердан ўқишганини аниқ айтиб бериша олмади. Саволим шуки, юқоридаги айтиб ўтканим ҳақиқатдан ҳам шундайми? Бу ҳақида қайси китобдан ўқиб билсам бўлади? Жавобингиз учун олдиндан чексиз миннатдорман. Аллоҳ рози бўлсин. Ҳурмат билан, Баҳодирбек.
Ва алайкум ассалом! Ушбу рўзани кетма-кет тутиш шарт эмас. Шаввол ойининг ичида олти кун тутилса бўлди. Абу Айюб ал-Ансорий розияллоҳу анҳудан ривоят қилинади: «Набий соллаллоҳу алайҳи васаллам: «Ким Рамазон рўзасини тутиб, кетидан Шавволдан олти кун рўза тутса, йил бўйи рўза тутгандек бўлади», дедилар». Бешовларидан фақат Бухорий ривоят қилмаган. Шарҳ: Рамазон ойидан кейин келадиган Шаввол ойида олти кун нафл рўза тутишга тарғиб қилиш ўзига яраша ҳикматга эга. Аввало, доимо нафл рўза тутишга тарғиб қилинади. Қолаверса, Рамазон бўйи рўза тутиб юриб, Шавволда бирдан ўзини овқатга уриш ҳам яхши эмас. Табиблар ҳам очликдан чиққандан кейин овқат истеъмолини аста-секин кўпайтиришни тавсия қиладилар. («Ҳадис ва ҳаёт» китобидан). Валлоҳу аълам!
