Намоз вақти

– Ва алайкум ассалом! Зарурат бўлса, зарари йўқ. Хуфтонни тақвимдаги вақти чиқиб кетмасидан олдин ўқисангиз бўлди. Аммо бунга кўникмаслик, одат қилмаслик керак. Чунки ҳадиси шарифда шундай дейилган:

عَنْ أَبِي بَرْزَةَ رَضِي اللهُ عَنْهُ أَنَّ النَّبِيَّ صَلَّى اللهُ عَلَيْهِ وَسَلَّمَ كَانَ يَكْرَهُ النَّوْمَ قَبْلَ الْعِشَاءَ وَالْحَدِيثَ بَعْدَهَا. رَوَاهُ الشَّيْخَانِ وَالتِّرْمِذِيُّ 

Абу Барза розияллоҳу анҳудан ривоят қилинади:
«Набий соллаллоҳу алайҳи васаллам хуфтондан олдин ухлашни ва ундан кейин гаплашишни хуш кўрмас эдилар».
Икки Шайх ва Термизий ривоят қилишган.
Шарҳ: Бу ривоятда Пайғамбаримиз соллаллоҳу алайҳи васалламнинг хуфтон намозига тааллуқли икки одатлари ҳақида сўз бормоқда.
1. У зот соллаллоҳу алайҳи васаллам хуфтондан олдин ухлашни хуш кўрмас эканлар. Чунки ухлаб қолиб намоз вақти ўтиб кетиш хавфи бор.
2. У зот соллаллоҳу алайҳи васаллам хуфтондан кейин гаплашиб ўтиришни хуш кўрмас эканлар. Чунки ҳар кунни яхши амал билан тамомлаш имкони зое бўлади. Шунинг учун ҳам аҳли солиҳ кишилар уйқудан олдин витр намозини ўқишга уринадилар. (“Ҳадис ва Ҳаёт” китобидан). Валлоҳу аълам!