Турклар ҳақидаги хадис
Ассалому алайкум! Сахих Бухорий 2928 Абу Хурайра ривоятидан: Расулуллоҳ айтдилар, “Қисиқ кўзли, қизил юзли, ва пачоқ бурунли турклар билан жанг қилмагунингизча охират келмайди. Уларнинг юзлари тери билан қопланган қалқонга ўхшайди. Оёқ кийимлари жунг билан қопланган одамлар билан жанг қилмагунингизгача охират келмагай. (2928/Бухорий) шунақа хадис борми, агар бўлса шархлаб берсангиз
– Ва алайкум ассалом! "Саҳиҳул Бухорий"да ушбу ҳадис мавжуд.
95‑боб.
Туркларга қарши жанг қилиш ҳақида
عَمْرُو بْنُ تَغْلِبَ قَالَ: قَالَ النَّبِيُّ صَلَّى اللهُ عَلَيْهِ وَسَلَّمَ إِنَّ مِنْ أَشْرَاطِ السَّاعَةِ أَنْ تُقَاتِلُوا قَوْمًا يَنْتَعِلُونَ نِعَالَ الشَّعَرِ، وَإِنَّ مِنْ أَشْرَاطِ السَّاعَةِ أَنْ تُقَاتِلُوا قَوْمًا عِرَاضَ الْوُجُوهِ، كَأَنَّ وُجُوهَهُمُ الْمَجَانُّ الْمُطْرَقَةُ
Амр ибн Тағлиб розияллоҳу анҳу айтади:
«Набий соллаллоҳу алайҳи васаллам: «Соъатнинг аломатларидан бири жун пойабзал киядиган қавмга қарши жанг қилишингиздир. Соъатнинг аломатларидан бири юзлари тери қопланган қалқондек кенг қавмга қарши жанг қилишингиздир», дедилар».
قَالَ أَبُو هُرَيْرَةَ رَضِي اللهُ عَنْهُ : قَالَ رَسُولُ اللهِ صَلَّى اللهُ عَلَيْهِ وَسَلَّمَ : «لَا تَقُومُ السَّاعَةُ حَتَّى تُقَاتِلُوا التُّرْكَ صِغَارَ الْأَعْيُنِ، حُمْرَ الْوُجُوهِ، ذُلْفَ الْأُنُوفِ، كَأَنَّ وُجُوهَهُمُ الْمَجَانُّ الْمُطْرَقَةُ، وَلَا تَقُومُ السَّاعَةُ حَتَّى تُقَاتِلُوا قَوْمًا نِعَالُهُمُ الشَّعَرُ
Абу Ҳурайра розияллоҳу анҳу айтади:
«Расулуллоҳ соллаллоҳу алайҳи васаллам: «Кўзлари кичик, юзлари қизил, пучуқбурун, юзлари тери қопланган қалқонга ўхшайдиган туркларга қарши жанг қилмагунингизча, Соъат қоим бўлмайди. Пойабзаллари жун бўлган қавмга қарши жанг қилмагунингизча, Соъат қоим бўлмайди», дедилар».
Мазкур боб (ҳадис) далолат қилувчи воқеалар охирги саҳобийлар даврида бўлиб ўтган (Ибн Касир. Ал-бидая ван-ниҳая Т.6, 224,250-бет). Туркий қавмлар Исломни қабул қилиб, Ислом дини учун жуда катта хизматлар қилдилар (Қарзовий. Фатава муасира, Мансура: Дар ал-вафо. 1994. Т.2. 72-бет). Валлоҳу аълам!
