Ҳад ва таъзир жазоларини фарқлар
Ассалому Алайкум муҳтарам ҳазрат! Илтимос мани қуйидаги саволимга жавоб берсангиз. Ҳад ва Таъзир жазоларини аёллар ва эркакларга нисбатан қўллашда қандай фарқлар мавжуд? Олдиндан миннатдорчилик билдираман. Аллоҳ рози бўлсин!
– Ва алайкум ассалом! Пайғамбаримиз соллаллоҳу алайҳи васаллам: «Ҳаддларни (шаръий жазоларни) шубҳали бўлса, қайтаринглар», деганлар.
Имом Термизий ривоят қилган бошқа бир ҳадисда эса:
«Иложи борича мусулмонлардан ҳаддларни қайтаринглар. Бирор йўли топилса, қўйиб юборинглар. Албатта, имом (ҳоким)нинг адашиб афв қилиши адашиб жазо беришидан кўра яхшироқдир», деганлар.
Ўтган ҳодисаларни ўрганиш жараёнида зинокорни тошбўрон қилиш ҳақида тасаввур ҳосил бўлди. Кўпчилик бўлиб, эркак кишини ўртача тошлар билан тошбўрон қиладилар, аёл кишини эса, аввал кўкрагигача чуқурга кўмиб туриб, сўнгра тошбўрон қиладилар.
Эркак жиноятчи тик турғазиб, аёл ўтқазиб, дарра урилади. Эркак кишининг қалин кийимлари ечилади. Аёл кишининг қалин кийимлари ечилмайди. Дарра жуда иссиқ ёки жуда совуқ пайтда урилмайди. Шунингдек, жиноятчи боғланиб ёки чўзилтириб қўйилмайди. Баъзи фуқаҳолар юз даррани йигирма даррадан бўлиб-бўлиб, беш кунда урса ҳам бўлади, деганлар.
